Shillong, Jymmang 04: Ki nongialam ka BJP Meghalaya ha ka sngi Nyngkong kila pynpaw ia ka jingkyrmen ba ka seng kan jop bun ngut bad kan ialam ia ka sorkar ha u snem 2028.
Da kaba pynpaw ba ka jingtrekami bha jong u Myntri Rangbahduh ka ri u Narendra Modi bad ka jingleh bha ka BJP ha Assam ka dei ka sabut jong ka jingbiang ka rukom synshar.
U Myntri Sorkar bad Nongialam ka BJP Bah Sanbor Shullai ula ong, ba ka seng kan nang kiew na ka jingdon tang ar ngut ki MLA ban jam syndon ha kaban thaw ia ka sorkar.
Haba kylli kumno ka seng kan kiew kynsan na ka jingdon 2 ngut ki MLA sha ka 32 ngut kan urlong, ula ong, “Ngi ngin iatrei shitom. Ki paitbah la ki dei ha nongkyndong ne sor mynta kilah sdang ban pdiang ia ki kam kiba bha kiba la leh da u Myntri Rangbah Duh Narendra Modi.”
“Dei halor kane ba ngin sa jop bad ngin thaw ia ka sorkar ha u snem 2028,” ong u Bah Shullai.
Ula bynrap ba “Haba ngi leit shano shano ruh ha ki thain nongkyndong, baroh ki briew khamtam eh ki hynmen ki para ki jong ngi na ka Balang Khristan ha u snem 2028, kin vote ia ka BJP shispah na ka shispah”.
Katba u MLA ka BJP na Pynthorumkhrah u Bah AL Hek ula pynpaw lang kumjuh ba ka BJP kala nang khlain ha ka ri baroh kawei.
“Ka BJP kala sdang da kaba jop tang ha ki 2 tylli ki seat bad mynta kala don haduh palat 200-300 seat. Kane kan sa urlong ruh hapoh Meghalaya,” ong u Bah Hek. “Na ka 2 seat, ngin sa iaid ha kaban ialam syndon ia ka sorkar hapoh ka jylla Meghalaya”.
Ha kaba iadei bad jingai jingkyrshan kaba mynta ia ka sorkar MDA kaba la ialam da ka NPP, u Bah Hek ula pynshai ba kadei tang ka buit treikam ha ka kam sain pyrthei.
“Ngi don ha ka sorkar kum ka kynhun kaba iatreilang hynrei haba ngi iakren shaphang ka elekshon, ngin iakhun la ka jong bad ka BJP kan iakhun marwei na ka bynta ka elekshon ban wan ha u snem 2028” ula ong.
Katba u Nongaiktien ka BJP u Bah Mariahom Kharkrang ual ong, ba ki kam ki jam kila iaid shakhmat na ka bynta ban jied ia u kyrtong ban iakhun ia ka elekshon shiteng samoi jong ka MP Lok Sabha na Shillong.
“Ha ka jingshisha ngi lah ioh bun ngut kiba la aplai bad shisien ba lah dep ban shim ia ka rai, ngin mih pura na ka bynta uno uno u kyrtong uba shah jied. Hynrei ia ka Tarik jong ka elekshon kadei kaei kaei kaba ym pat pynbna” ula ong.
Ha kaba iadei bad ka jingpynkhreh ia ka elekshon shiteng samoi, u Bah Kharkrang ula ai nuksa ia ka rukom synshar ka BJP ha Assam. “Shu shim ia ka nuksa ia ka jylla Assam, nga tharai hadien 10 snem jong ka jingsynshar ka BJP ha Assam bad ha kiwei pat ki jylla, kaei kaba ngi lap ha ka Assam kadei kaba ki kyrshan ia ka rukom treikam ka sorkar ia kaba kam ju jia” ula ong.
“Phi iohi ba ha Tamil Nadu kala don ka jingpyrshah ia ka sorkar hynrei ha ka jylla Assam, kham mynshwa ka jingioh vote bad ka jingshah jied ki nongmihkhmat kala nang bun, kata kadei ka rukom treikam jong ka BJP” ula bynrap, “Shisien ba phi lah ioh ia ka sorkar BJP kadei katei kaban jia, kiwei kiwei ki seng sain pyrthei kim long shuh kiba kongsan”.
Haba kylli la ka jylla Meghalaya kaba bun eh ki riewngeit Khristan kin ktah ia ka BJP, u Bah Kharkrang ula ong, ba ki kam pynroi kin iaid palat ban ia kiwei pat ki bynta.
“Wat lada kadei kaba bun eh ki Khristan hynrei ki paitbah ki kwah ia ka roi ka par, ki briew ki kwah ban iohi ba ki khun ki jongki kin iohkam iohjam” ula ong.
“Kaei kaba jia mynta, wat haba kila don ia ka kyrdan ka bapher, ka lad ka long ba kin mih na la ka jylla ne kidei ban kmen ia ka jingsiew kaba rit kaba ki ioh pdiang, kaei kaba ki paitbah ki kwah kadei ka roi ka par jong ka jylla bad katei ka roi ka par, kadei kaba la pawshai kdar ba dei tang ka seng BJP kaba lah ban wanrah ia ki kam pynroi” ula bynrap.
U Bah Kharkrang ula ong, ba ka seng kan sa jop bun ha u snem 2028.
“Ngan iathuh lypa mynta, nga ong mynta bad phin sa iohi ha u snem 2028 haba phin wan biang sha ngi, phin sa iohi ba ka BJP kan ioh ne jop bun ngut bha (double digit)” ula ong.
“Ngam kwah ban kren eiei halor kiwei pat ki seng sain pyrthei hynrei ia ka BJP phin sa iohi ba ngin sa ioh ia ka Double Digit ha u snem 2028.”
