Kyntait ba shim T.3 klur na ka Tnad Ain ka Sorkar
Shillong, Nailur 03 : U Advocate General Amit Kumar ha ka sngi Palei ula mih ban ai jingkren hadien ba mad ia ka jingiakhih ki nongiasaid ain ba dawa weng ia u, bad ong ba ki jingkynthoh jong u halor ka jingkynnoh jrong kti u muktiar ia ka samla pule ba wan leh intern ka dei kaba la pynman bakla kum ka jingkynthoh ia ka Bar Association baroh kawei.
“Kane ka jingiakynduh bad ki lad pathai khubor kam long pyrshah ia ki Bar Association lane ki dkhot jong kine ki Bar. Nga dang dei u dkhot ka Bar, la nga dei u AG ne ym dei ruh” ong u Kumar.
U Amit Kumar u ong ba kane ka kynrum kynram ka mih hadien ba kawei ka samla pule ba leh intern kala ujor pyrshah ia ka jingshah jrong kti khlem akor ha uwei u dkhot bala rangbah jong ka Bar.
“Ka jingjia ba sngewsih kaba jia. Kane ka samla pule ba leh inter kala mih shakhmat bad mudui ia ka jingujor. Ki kynhun Sengbhalang kila leh eiei halor kane, kaba long ka kam ba sngewsih. Ngim dei ban shim ia ka ain hala ka jong ka kti” ula ong.
Kat kum ka jingong u Amit Kumar, ia ka case la register ha ka 29 tarik Naitung pyrshah ia une u muktiar bala rangbah, katba ia ka ejahar la register ha a 31 tarik Naitung pyrshah ia kito kiba shoh ia une u muktiar, hadien ba ia kane ka jingjia la shimkhia da ka High Court”.
Ha ka 31 tarik Naitung, 87 ngut ki nongsaid ain kila ai jingthoh sha ka High Court Bar Association ba dawa ia ka bor khmih ka ban peit ia kum kine ki jingujor bad ban pynthikna ia ka jingtreikam kaba shngain na ka bynta ki muktiar kynthei, ula ong.
“Ka High Court kala pan ia ka kaiphod halor ka jinglong jingman ka kam bad ngi la aiti ha ka 3 tarik Nailar, kaba pynpaw ba ia u nongshah kynnoh lah dep ban kem” ula ong.
U Kumar ula kam ba une u juh u muktiar u dei uba la shah kynnoh teng ha kum kine ki juh ki kam kham mynshuwa.
“Shuwa ka 3 tarik Nailar, kawei ka muktiar Sorkar ba dang khynnah, kala pyntip ia nga ba kane ka jingjia (shah jrongkti ka samla leh intern) kam dei satia kaba dang jia ha ka sien ba nyngkong, Une u juh u briew la kynnoh ba ula jrong kti khlem akor ia kawe ka intern ha u 2017. Na ka case diary, Nga shem ba ha u snem 2024 ruh, kawei ka samla leh intern kala shah jrong kti ha une u juh u briew bad ia ka statement jong ka lah dei ban buh jingthoh” ula ong.
U Amit Kumar u ong ba une u muktiar ba shah kynnoh ula don hapoh ka panel ka Sorkar naduh u 2013 bad ia kine ki jingjia ba jia hashuwa, um don jingtip satia tad haduh ba don kiba iathuh ia u.
U Amit Kumar u iathuh ba ia ka case 2017 lah pynkut noh namar ka jingduna ki sakhi watla ka statement kaba shai na ka lanot kaba la jer kyrteng ia u.
“Ia kane ka case la pynwai noh wat hapdeng ki sakhi kiba biang. Kum u AG, ka dei ka kamram jong nga ban pynthikna bala shimkhia ia ka bha ka miat jong baroh ki dkhot. Nga khlem kynnoh ia ka High Court Bar Association lane ka Shillong Bar Association” ula ong.
U iathuh ba la don kiba bthah ia u ban sei ia ka kyrteng jong ka nongmudui hynrei ula kyntait. “Ka dei ka kamram jong nga ban nym sei ia ka kyrteng jong ki lanot” ula ong.
U ong ba dei namar kine ki jingkynthoh ba ula shah beh na ka Bar Association ha ka 5 tarik Nailar.
“Nga la pan ia ka lad ban pynshai ba nga khlem kren sniew ia kino kino ki dkhot ka Bar. Ia kane ka kam la pynpoi sha ki national media bad ka Supreme Court Bar Association kala kyntu ia ka Meghalaya High Court Bar Association ban weng noh ia karai jongki” ula ong.
“Lada kaei kaba nga kren kala pynmong iano iano, kila dei ban leit rah sha ka High Court ba kan leh eiei pyrshah ia nga. Ha ka jaka kane, kila kynnoh shimet pynban ia nga ba nga iarap iaki muktiar na Delhi bad pyndonkam bakla ia ka Ophis jong nga” ula bynrap.
Haba kyntait ba ula shim advance ba T.3 klur na ka Tnad Ain, u Kumar ula ong “Ha kine ki phra snem shiteng kum u AG, Ngam pat ju shim shi naia ruh kum ka advance. Kila dei ban pynthikna shuwa ia ka jingshisha. Nga pdiang ia kano kano ka jingtohkit da ka Sorkar Jylla. Ka jingshisha ka dei ban mih”
Halor ka jingkynnoh ba aikam ia ki muktiar nabar Jylla, ula ong baroh 39 ngut ki muktiar Sorkar ki dei na Meghalaya bad 11 ngut kiwei pat, kynthup ka kurim jong u bad u khun, ki trei na ka bynta jong u khlem da phah siew ha ka Jylla.
“Naduh ka 1 tarik Nailar haduh 31 tarik Nailar, Nga la khmih haduh 1001 tylli ki kam- ki jingai jingmut, ki jingpynshna ia ki jingthoh bad ka jingleit iasaid mukotduma. Kane ka kam ka donkam ia ki nongkyr shan ban wadbniah. Ym don uwei ruh na kine ki 11 ngut ki muktiar, kynthup ki bahaiing hasem jong nga, kila pan jingsiew hakine ki phra snem shiteng. Lada ki don ia ki sakhi ban pynshisha ba ki pan pisa, Ngan iehnoh na ka kam” ula ong.
Halor ki case kiba rim, ula ong ba un sa kyrpad ia ki bor Sorkar ba kin plie biang ia ka case jrong kti ia ka intern u snem 2017.
