“Ka Hat-trick ryngkat ka century”: Pynkhreh ka kynhun NDA ba ialam ka BJP ban thaw Sorkar biang ha Assam

Guwahati, Jymmang 4: Ka kynhun National Democratic Alliance (NDA) ba ïalam da ka BJP, ka la long ba la khreh ban thaw ïa ka sorkar ha Assam, ha ka sien kaba lai lynter, ha kaba ka kynhun synrop, kala jop suk ïa ka jingbun paid ki MLA.

U Myntri Rangbah ka Jylla Himanta Biswa Sarma, u la ioh ïa ka jingjop kaba radbah ha Jalukbari constituency bad u la batai ïa kane ka jingjop kum ka “hat-trick bad ka kamai shispah (century),” kaba pyni ïa ka jingjop shimet jong u bad ka jingïatrei lang kaba khlaiñ jong ka kynhun ha ka jylla baroh kawei.

Ki jingrakhe ki la paw shynna ha Bajpayee Bhawan ha Guwahati da ka jingkmen, ha kaba ki nongtrei jong ka party, ki la ia lum paidbah, da kaba pynher ia ki lama bad ki pyrta ia ki slogan.

Ki tyllong khubor jong ka seng ki la iathuh ba ka jingpynkhreh ka la iaid shakhmat na ka bynta ka jingbam smai, kaba lah ban long ha ka 8 tarik u Jymmang.La khmih lynti ruh ba ki nongialam ba rangbah jong ka BJP kin iakynduh ia u Lat ka Jylla kham hadien ban buh ia ka jingkam ban ioh thaw ia ka sorkar.

Haba kynthoh halor kane ka jingshanniah ki paidbah, u Sarma u la ong ba kane ka jingjop ka pyni ïa ka jingshaniah jong ki paidbah ha ka jingïalam jong u Myntri Rangbahduh ka ri u Narendra Modi bad ka jingsynshar jong ka NDA ha kine ki phew snem ba la dep.U la batai ia ka result kum ka jingkyrshan ia ka roi ka par, ka jingpynkupbor ia ki kynthei, bad ka jingthmu jong ka “Viksit Assam.”

U Myntri Rangbah ka Jylla ula ai khublei ruh ïa ka jingtrei shitom jong ki nongtrei bad ki nongïalam jong ka party, kynthup ïa u state president ka BJP u Nitin Nabin bad u Myntri kam pohïing jong ka sorkar pdeng u Amit Shah, na ka bynta ban pynmih ïa ka jingkyrshan ha baroh kawei ka jylla.

Ki national leaders ki la pynpaw ia kajuh ka jingsngew.U Modi u la ai khublei ïa ki nongtrei jong ka party na ka bynta ka “jingtrei shitom jong ki baroh,” katba u Shah u la khot ïa ka jingmih kum ka “historic hat-trick mandate” bad ka jingpynpaw ïa ka jingtrei jong ka sorkar NDA ha Assam kaba shngaiñ bad kaba kiew shaphrang.

U myntri ka sorkar pdeng u Sarbananda Sonowal u la khot kum ka “jingsynshar kaba don ha ka histori,” da kaba ai khublei ia ki paidbah ka Assam kiba la kyrkhu ia ka NDA ba la ialam da ka BJP da ka samoi kaba lai.U la ong ba hapoh ka jingialam jong u Modi ka la pynkylla ia ka Assam bad ka thain shatei lammihngi bad u la ai burom ia ka bynta jong u Shah ban pyniaid ia ka jylla na ki snem jong ka jingleh pyrshah na ki kam pyntriem bad jingbym shongsuk shongsain.

U Myntri Rangbah ka Jylla Meghalaya, u Conrad K Sangma, u la ai khublei ïa u Sarma halor ka “jinglah ban treikam bha” jong ka party jong u bad ba sa shisien pat u la ïoh ïa ka jingshaniah naki paidbah ka Assam.U la ai khublei ruh ïa u Shah bad ïa ka BJP kiba la ïoh ïa ka jingkyrshan kaba skhem ïa ka jingthmu pynroi jong ki ha kane ka thaiñ.

Ki Political observers ki la kdew ba ka jingheh jong ka jingsynshar—kaba ïaid kylleng ki thaiñ naduh ka Barak Valley sha Upper bad Lower Assam—ka pynpaw ïa ka jingkyrshan kaba shyrkhei ïa ka BJP shaphang ka roi ka par bad ka sain pyrthei.