Dibrugarh, May 2: Kum shi bynta ban weng noh ia ka jingeh halor u pud u sam uba la sahteng la slem bha, ka kynhun ïatreilang jong ki ophisar na ka jylla Arunachal Pradesh bad Assam, ryngkat ki riew shemphang na ka tnad Survey of India, ki la pyndep ïa ka jingpynshisha ïa ka jaka (geospatial verification exercise) ha shi lynter u pud u sam jong ka East Siang.
Ka Mama Natung, myntri ka tnad Public Health Engineering bad ka tnad Water Supply jong ka jylla Arunachal Pradesh, ka la iathuh ba ka jingwad bniah, kaba la pynlong ha ka 30 tarik Iaiong bad 1 tarik Jymmang, ka la ithuh ia ki 19 tylli ki jaka ban buh ia ki mawpud da kaba pynshong nongrim ha ki KML/geospatial ba la pynshisha lang.
Ka jingjurip ka la ktah ïa ka bynta naduh ka liang kadiang jong ka wah Siang haduh ka thain Oyan–Jampani bad kan bteng haduh ka shnong Depi.
Ka Natung ka la ïathuh ba ïa ki coordinate naduh Jampani haduh ka Ruksin Check Gate la dep ban pynshisha, ha kaba ïa ki jingduna ba rit ha ka jingkieng Oyan la lah ban pynbeit.Ka la bynrap ba ka rukom treikam kaba stad kan pynthikna ia ka jingbuh ia ki mawpud kiba thikna bad khlem jingartatien da ka PWD.
Ia kane la pyndep da kaba iaid beit iaid ryntih, ha kaba ki ophisar na baroh ar tylli ki jylla bad ka Survey of India ki la don lang, kaba pyni ia ka jingiatreilang ha kaba iadei bad ka jingpynbeit ia u pud u sam.
