Shillong, Jymmang 02: U Myntri Rangbah ka Jylla u Conrad K Sangma hynne ka sngi Saitjain, ula plie ia ka madan ialehkai bad ia ka Indoor Sports Stadium ha Umlyngka, Upper Shillong, kum ka dak jka jingpynkhlain ia ki jingtei ha ka kam ialehkai bad ia ki kam pynroi jong ki samla ha ka thain.
Ha kane ka jingplie la wan ban iashimbynta da u MLA ka Mylliem bad u Deputy Chief Whip u Bah RV Lyngdoh ryngkat bad u Bah Hamletson Dohling, ki heh ophisar na ka tnad Ialehkai, ki dkhot jongka Dorbar Shnong bad ki nongshong shnong.
Haba kren ha ka jingialang, u Myntri Rangbah ula ong, ba ka sorkar kala pynleit jingmut ha kaban wanrah ia ka roi ka par ha kylleng ki bynta bad ki thain bad ka banjur ba ka jingkynshew tyngka ha ki samla bad ka imlang sahlang ki long kiba kongsan tam na ka bynta ka jingkiew kaban neh slem. “Kane kam dei ka jingpynlut hynrei ka jingkynshew ha ki samla ki jong ngi bad na ka bynta ka lawei jong ka jylla” ula ong.
Kane ka projek kaba ha ka jinglut kaba kot T.3.5 Klur ka kynthup ia ka Indoor Sports Hall kaba la biang pura kaba don ia ka jaka ialehkai Badminton, jaka bujli jain, painkhana bad ka kamra na ka bynta ki nongbishar. U Sangma ula ong ba kum kine ki jingtei kin iarap ha kaban saindur ha ki jingialehkai, ka mynsiem iakhun kum ki nongialehkai bad ka sap ka phong hapdeng ki khynnah.
Ula pynpaw ruh ia ki jingpyrshang jong ka sorkar ban tei ia ka jinglong jingman kaban ai jingkyrshan ia ki nongialehkai bad ia ki Sports Association ryngkat bad ka jingpyniar ia ki jingtei ha kylleng jong ka jylla.
Ia kane ka jingtei la khmih lynti ba kan ai jingmyntoi ia kumba 3,000 ngut ki khynnah bad samla jong ka shnong, ki khynnah pule jongka Umlyngka Pre-Secondary School, San Shnong Secondary School, Phila Rapsang Secondary School bad ka Thomas Jones Secondary School.
Ula kyntu ia ki nongshong shnong ba kin iashimbynta, u Myntri Rangbah ula iawer ia ki nongshong shnong ba kin shim lang ia ka jingkitkhlieh ban pynneh ia ki jingtei bad ban pynthikna ba yn lah ban pyndonkam slem bha ia ki.
Ki ophisar kila ong, ba ka projek kadei shi bynta jongka jingpyrshang ka jylla ban kyntiew ia ki kam ialehkai ha ki shnong ki thaw bad ban thaw ia ki kabu kiba biang na ka bynta ki samla ha kylleng jong ka jylla Meghalaya.
