Shillong, Jymmang 2: U Myntri Rangbah ka jylla Meghalaya Conrad K Sangma ha ka sngi Saitjain u la leit ban iuh kjat hapoh ka shnong Madanriting bad u la leit ban iadon lang ha ka prokram jong ka dorbar shnong kaba la pynlong ha St Peter’s Secondary School, ha kaba u la pyllait paidbah ïa ka ambulance bad ka mortuary van jong ka shnong.
Ha kane ka sngi la ia donlang ruh u Bah Lambor Malniang, ka MP barim Rajya Sabha ka kong Wansuk Syiem, u Bah Pyniaid Sing Syiem ha ryngkat bad ki nongialam shnong, ki paidbah nong shong shnong, ki khynnah skul bad ki nonghikai.
Ha kane ka prokram la ai khublei ïa ki samla pule kiba la pass bha, ki riew ba ïakhun pyrshah ïa ka khlam covid, ki pulit, ki nongtrei ba pynphuid ïa ka shnong ka thaw, ki nongtrei ASHA, ki nongjop ha ka jingïalehkai bapher bapher bad ki rangbah bad ki longkmie kiba la heh ka rta jong ka shnong.
“Ka long kaba pynkmen shibun ban ïohi ba ka Dorbar Shnong ka la pynbiang ïa kine ki jingdonkam kiba kongsan na ka bynta ka shnong ki ban pynsuk ban kit ïa kiba pang ne kiba mynsaw bad ka jingkit kaba shngain bad kaba don burom ïa kiba la khlad noh,” u la ong.
Shuh shuh u la bynrap ba ka long kaba kongsan ban ai burom bad ban pyni ïa ka jingsngewnguh da kaba bynrap, “Ka kam kaba ngi leh ne ki jingjop ha ka jingim jong ngi kam ju long kaba rit ne kaba heh than hynrei ka jingsngewnguh ka lah ban wanrah ïa ka jingkylla kaba khraw,” bad pynpaw ba ka prokram pynkup burom na ka bynta ki briew na baroh ki liang ka long shisha kaba dei ban ïaroh.
Halor ki katto katne ki jingeh bad jingsngewkhia ba la pynpaw da ka Dorbar Shnong ha ka dorkhas ba la ai ha u, u Myntri Rangbah ka Jylla u la kular ban pynbha, pynthymmai bad shna ïa ki jingdonkam ba kongsan na ka bynta ka madan ïalehkai ha shnong Mandanriting bad ka kynroh ban pynskhem ïa ka community hall. U la pynthikna ruh ban don ki light surok bad ki CCTV na ka bynta ka thain hapoh ka My City Campaign.U la bynrap shuh shuh ba yn sa bishar bniah ia kiwei pat ki jingeh jong ka shnong.
U la ai ruh ïa ka jingïarap pisa kaba T.2 lak na ka Chief Minister’s Special Grant sha ki skul kiba la ïa shim bynta ban pyni ïa ki sap ki phong ha ki jingshad kiba pyni ïa ka kolshor jong ka jylla bad ka rwai ka siaw.
