Iano ki paidbah kin ngeit? | Ki Liang Pyrshah ki khot ‘Nongshun’ ia ka Sorkar MDA, ki Nonghikai ki iaroh kum ka ‘Hero’

Shillong, Jymmang 2 : Ha ka por ba ki seng sain pyrthei ba don ha ka Liang Pyrshah ki pynsawa jam ia ka sur ha ki social media ba pynman ia ka Sorkar Meghalaya Democratic Alliance (MDA) kum ka Sorkar ba isih nonghikai, hynrei ka jingrwai shoh mynsiem bala rwai da ki spah ngut ki nonghikai SSA ha ka jingialang pynkup burom ia u Myntri Rangbah Conrad K Sangma ka pyni pat ia kawei ka dur-kawei pat ka jingsngew ha ka sngi Thohdieng.

Kane ka jingialang, bala pynlong da ka Meghalaya SSA School Association (MSSASA) bad ka Meghalaya 4th Teachers Association ha madan Student, Jaiaw, ka dei kaba thmu ban pynkup burom ia ka Sorkar namar ka jingpyntreikam ia ka Structured Pay Framework (SPF) ne ka jingsiew tulop bala pynbeit ryntih, ka sienjam kaba thmu ban kyntiew ia ka kamai kajih bad ka jingiada ia ki kam ba ki nonghikai SSA bad 4th Teacher ki trei ha kylleng ka Jylla.

Hynrei, khlem da khein ia ki jingkren bad ki jingleh rukom, ka jingrwai ba shna hi ha ka ktien Khasi-English da ki nonghikai ka dei kaba khring duh ha kane ka jingialang.

Da ki spah ngut ki nonghikai kila rwai ia kane ka jingrwai, kaba ki kyntien ki don ki ktien kiba thew sha ka jingsngewnguh ia u Myntri Rangbah ka Jylla bad ki Myntri jong ka Sorkar MDA-I bad MDA –II.

“Honourable CM sir and dearest Dy. CM; Sir R.A Sangma, for you Sir Rymbui, we appreciate your act like hero. We will never forget and always love you,” rwai ki nonghikai.
Kawei pat ka lain ka ong : “Thank you so much dearest ministers, that you helped us to overcome in life.”

Ka jingrwai bala rwai ka dei ka jingpynsngew ia kaei kaba sngew shimet shimet ym kaba iakhleh kam sain pyrthei. Ki jing pynpaw na ki nonghikai kiba ong ba khatduh khatwai lah don ba sngap ia ki hadien da ki snem ka jingbym sngew thikna halor ka tulop bad ka jingshngain ka kam. Ka jingrwai hynnin ka sngi ka pyni ia ka jingbakla ia kaei kaba ki seng sain pyrthei ha ka Liang Pyrshah ki pyrshang ban pyni sha ka pyrthei, ha kaba kine ki seng sain pyrthei kila kynnoh ia ka Sorkar ba ialam da u Conrad K Sangma kum ka Sorkar kaba leh bym suidniew ia ki nonghikai bad ka bym shym la leh eiei ban weng ia ka jingeh jong ki.

Lah ban kdew ruh, u President ka Meghalaya SSA School Association Bah Aristotle Rymbai ula pynpaw dang shen ia ka jingsngewnguh ia ka Sorkar Jylla, khamtam ia u Myntri Rangbah ka Jylla Conrad K Sangma, namar ka jingpynthikna ia ka jingskhem ka kam ki nonghikai SSA bad ba pyntreikam ia ka revised pay structure nalor ki allowance hashuw u bnai Iaiong 2026.

Ha ka jingthoh social media ba dang shen, u Bah Aristotle ula shim ia kane ka jingtuklar jong ka Sorkar kum ka “bym lah klet shuh” bad iaroh ia ka jingkut jingmut ban iada ia ka kamai jakpoh ki nonghikai bad ban pynkhlain ia ki kam ha ka pule dangle.

U Myntri Rangbah ka Jylla Conrad K Sangma ha ka jingialang hynnin ka sngil, ula kubur ia ka jingeh bala mad da ki nonghikai SSA kaba la iaid da ki snem bad ong ba ka Sorkar kala trei khlem shongthait ban shem ia ka jingpynbeit kaban neh shirta lyngba ka Structured Pay Framework (SPF).

“Phi la mad ia shibun ki jingjynjar, ki jinglen lade bad jingialeh, hynrei nga kmen ba nga lah ban don bynta ha kane ka jingiaid lynti” ula ong, haba ban jur ia ka jingkut jingmut jong ka Sorkar ban pynthikna ba ki nonghikai ki dei ban ioh ia ka burom, ka jingleh hok bad ka jingbiang ka kamai kajih”.

Katba ki jingiakren ha ki rynsan social media ki dang iai bteng ban tah dur ia ka Sorkar kum ka nongshun ha ka kam ki nonghikai, ki nonghikai pat dalade kila ieng ryngkat bad u Myntri Rangbah bad pynpaw paidbah ia ka jingsngewnguh ia ka Sorkar.

Ka jingpynkynmaw hangne ka long ba kaei ka jingiakren kaba mih ha ki rynsan social media kim mut satia ba ki dei ki jingshisha kaba la mad da ki briew kiba don bynta ha kane ka kam.