Shillong, Jymmang 1: U Lat ka Jylla Meghalaya CH Vijayashankar ha ka sngi Thohdieng, ula ot ribon ia ka State Campaign for Self-Enumeration ka jylla hapoh ka Census of India 2027 ha Lok Bhavan, kaba pyni ia ka jingshim ka jylla ia ka sienjam ban pynlong ia ka ri India kaba nyngkong ha ka Digital Census kaba pura.
U Vijayashankar ula plie ruh ia ka sienjam ban pyntreikam pura ia ka Self-Enumeration ha ka Self-Enumeration Portal, kum ka jingsdang ia ka nuksa na ka bynta ki nongshong ha kylleng jong ka jylla.
Haba kren ha ka jingialang, u Lat ula pynpaw ia ka jingkongsan, ka jingtreikam kaba khuid ba suba bad kaba ryntih jong ka Digital Self-Enumeration bad kyntu ia ki nongshong shnong ba kin iashimbynta pura ha kane ka sienjam.
Ula kitbok ia ka ophis jongka Directorate of Census Operations, Meghalaya bad pynpaw ba u don ia ka jingngeit kaba skhem ba kan lah ban pynlong ia kane ka jinglum ia ka Census kaban long kaba thikna bha, ka rukom leh kaba paka bad ha ka lynti kaba dei.
Ki lad ban leh ia ka Self-Enumeration na ka bynta ki nongshong shnong kan sdang naduh ka 1 tarik haduh ka 15 tarik u Jymmang 2026.
Kane ka rynsan Online kan ailad ia ki riewshimet ba kin pyndap ia ki jingtip kiba bniah na ka bynta ka longiing longsem ka jongki bad hadien yn sa wan ban pynshisha pat da ka jingleit jurip ha man la ki thliew iing.
Ki ophisar kiba la don ha ka jingialang, kila pynpaw ba kane ka sienjam kadei ka bynta kaba kongsan jong ka Census 2027 bad ka pyni ruh ba ka sorkar ka iengskhem ha kaban pyndonkam ia ki kor teknoloji ban pynbha ia ka rukom ai jingshakri ia ki paitbah bad ban thaw ruh ia ki polisi treikam kiba iaid katkum ka jingshisha.
La pynshlur ruh ia ki nongshong shnong ba kin pyndep ia ka Self-Enumeration ha ka por kaba la buh ban pynthikna ba ka jinglum ia ki jingtip kan long kaba shisha bad kaba thikna.
Ka Dr Pooja Pandey, Commissioner & Secretary ka Sorkar Meghalaya bad ka State Nodal Officer for Census, u Biswajit Pegu u Director of Census Operations ka Sorkar India ryngkat bad ki heh ophisar jong ka Directorate of Census Operations, Meghalaya bad na ka sorkar jylla kila iadonlang ha ka jingsdang ia katei ka sienjam.
