Shillong Nailur 27: U Symbud Myntri Rangbah ka jylla Bah Prestone Tynsong u la pyntip ba ki lai tylli ki Regional Committee ka jylla, kin sa lum ia ka jingialang bad ki Autonomous District Council lem bad ki Khlieh Nongsynshar ban iatai bad iasyllok halor u pud u sam hashuwa ba ki Committee kin iaid shakhmat bad ka jingjurip ia u pud u sam.
“Ki Regional Committee kin sa lum iaka jingialang ha kaba kin sa khot lang ia ki Syiem, ki District Council, Rangbah Shnong ban iatai ia ki mat kiba iadei bad u pud u sam” ong u Bah Prestone haba iakren bad ki nongthoh khubor.
Kat kum ka jingong jong u, ka Sorkar kam kwah shuh ban nang shah kynnoh kumba la mih ha ki sngi bala dep, ba kam ba ka Sorkar kam shym la syllok bad ki kynhun ba iadon bynta ha ka kam, ka by mong satia kaba shisha.
“Ha ka jingshisha ngi la lum ia bun tylli ki jingialang ha ka wat iakren pynbeit pud ba nyngkong hashuwa ba ngin pynbeit ia ka Tarik ban pynlong ia ka jingjurip lang bad ka Assam ia ki jaka ha khappud” ula ong.
U Symbud Myntri Rangbah u pyntip ba ka Sorkar kan sa lum noh ia ka jingialang jong ki Regional Committee bad hadien kane, kan s alum ia ka jingialang bad ki ADC lem bad ki Khlieh Nongsynshar.
Ha kajuh ka por, u Symbud Myntri Rangbah ula pynshai ruh halor ka jingthung ia u CEM ka JHADC kum u dkhot ka Regional Committee katba ia u CEM ka KHADC pat ym shym la kynthup lang.
“Ka Sorkar kala thung ia u CEM ka JHADC namar ba ha Ri-lum Jaintia, ka don tang kawei ka Regional Committee katba katba ha u pud u sam jong ka KHADC, ki don haduh ar tylli ki Regional Committee” ula pynshai.
U Bah Prestone ula ong ba ka jingbym kynthup ia u CEM ka KHADC ka dei namar ka jingiohi ba kan sa buh ha ka jingeh ia u (CEM) lada jia ryngkat ba ka jingjurip pud ha West Khasi Hills bad ha Ri-Bhoi ki hap ha kajuh ka sngi.
“Namar kata, ngi la thung ia u DyCEM ka KHADC Bah Gigur Myrthong kum u Dkhot ka Regional Committee ka West Khasi Hills bad ia u EM Elaka Bah Jambor War kum u Dkhot ka Regional Committee ka Ri-Bhoi District, kaba mut ba ki dei shibynta hi jong ka District Council nalor kata, ki MDC ka thain ruh ki dei kiba iadonlang” ula ong.
U la ong, lada donkam kitei ki committee ki dang lah ban thung shuh shuh ia ki dkhot hynrei ia mynta hi ka Committee kan lum shwa iaka jingialang kaba nyngkong ka jongka, ban khot ia kiba dei ban wan sha ka jingialang ka ban lum da ka Regional Committee bad ba kin aiti ruh ia ki kot ki sla, khnang ban ioh khmih bniah shwa ban leit jurip lang bad ka jylla Assam ha ka thain khappud.
Ha kaba iadei bad ka jingshah pyndik ki Khasi ha ki pulit Assam bad ki jaidbynriew Karbi, naka liang u Bah Prestone u la ong, “Kane ka jingeh kadei kaba la jia naduh mynshwa hynrei naduh bala thaw iaka Committee naduh ka wat kaba nyngkong ka kynrum kynram kala duna bha bad kadei ka jingshisha”.
“Baroh arngut ki Myntri Rangbah ka jylla Assam bad Meghalaya kila kren da kaba shai bad ai jing bthah ia ki bor pyniaid district ba kin pynthikna ba kan ym don kano kano ka jinghuri hura, ka jingiashoh ia dat ne ban pynthud ia kino kino ki kam pynroi” ula ong.
Haba kylli, u Bah Prestone ula ong “Ngin peit bad burom iaka jingkwah jong ki paidbah, namar dei ma ki hi kiba sngewthuh bha bad dei ma ki hi kiban ai iaka rai. Kane kadei kawei na ki kyndon ha kaban ia pynbeit ia u pud u sam”.
