Shillong, Iaiong 29 : Ka Sorkar Jylla ka don ia ka jingthmu ban pynkylla biang ia ka medical bond policy ban pynthikna ba ki doktor kin wanphai ban shakri hapoh ka Jylla hadien ba ki pyndep ia ka jingpule MBBS na ka bhah pule ka Jylla, kaba mad ia ka jingduna ki doktor khamtam ha ki jaka nongkyndong.
Haba iakren bad ki lad pathai khubor ha ka sngi Balang, u Myntri ka Koit ka Khiah Bah Wailadmiki Shylla ula iathuh ba ka Jylla ka phah ia ki samla pule ban pule MBBS manla u snem, hynrei bun kim ju wan phai ban shakri ha ka jylla khamtam ha ki shnong kyndong.
“Nga la shong jingialang bad u Myntri Rangbah bad ka Kynhun jong ngi na ki dotor bad ngi la pyrkhat ia ki lada ki lynti ba lada ngi lah ban wanrah ia ka jingpynkylla ha ka bond policy ruh namar bun na ki jingeh ba ngi shem ka long ba manla u snem, ngi la phah ia ki samla ban pule doktor hynrei bun kim ju wan phai shuh ban shakri ha ka Jylla khamtam haba ki ioh kam sha ki jaka nongkyndong” ula ong.
“Ta ka daw, ngi la pyrshang ban wanrah ia ka jingpynkylla ha ka bond policy ha kaba ki samla pule jong ngi, kiba leit pule MBBS hadien ba ki pyndep ia ki jingpule, kin hap ban wanphai bad ban trei hapoh ka Jylla” ula ong.
U Myntri ula kdew ruh ia ka jingiaid bha ki kam ha ka kam pule doktor, da ka jingsdang jong ka Shillong Medical College ia ka MBBS first batch mynta u snem.
“Kumba long mynta, phi lah ban iohi ba khamtam ha une u snem, ngi la lah ban sdang ia ka batch ba nyngkong jong ki samla ba pule doktor ha Shillong Medical College. Kane ka mut ba ka jingpule lain medical kala kiew” ula ong.
U bynrap ba ka Sorkar kala kyntiew kyrdan ruh ia ki Nursing School bad College ban nang pynbun ia ki lad ia ki samla. “Mynta ngi la pyrshang ban pynkyllla ia bun na ki Nursing School jong ngi sha ki Nursing College khnang ba kin nang kham ioh bun ki lad ki lyntu”.
Ban weng ia ka jingeh ha ka jingduna ki doktor specialist ha ki jaka nongkyndong, ka Tnad kala phah pule ia ki doktor da ki short term couse.
