Shillong, Iaiong 29 : U Myntri ka Tnad ialehkai ka Jylla Bah Wailadmiki Shylla ha ka sngi Balang ula iathuh ba ka Sorkar Jylla kan weng ia ka jingeh ha ka jingduna ki jaka sah na ka bynta ka National Games 2027 da kaba tyrwa subsidy ba 72-75% ban seng ia ki hotel bar it (boutique hotel) ha Tura bad Jowai.
U Myntri ula pynpaw ba ka Jylla Meghalaya kan long ka Jylla kaba lah ban pynlong ia ka Games kaba jop bad kan dei ruh kaba lehbha ha kane ka lympung.
U Bah Shylla ula pyntip ia kane hadien ba pyniaid ia ka jingialang ba nyngkong jong ka Governing Body jong ka National Games Secretariat Society. Baroh ki dkhot jong ki tnad bapher bapher kila wan ban iashimbynta.
U Myntri u pyntip ba ka Society kala rai ban nang pynbun ha ka jingdon ki dkhot na ka bynta ka jingiatreilang ba kham bha.
“Ka Society ka sngew ba ngi dei ban punbun ia ki dkhot ha kane ka Committee naba ym shym la don dkhot ba mihkhmat na ka tnad Tourism, Health, na ka Transport bad na ka Information & Public Relation” ong u Myntri.
“Kumta, ngi la shim ia ka rai ban pynrung shuh shuh ia ki dkhot khnang ba kan suk ia ngi ban iatreilang namar kumba phi tip baroh, ka Meghalaya Games kam dei tang ka jingialehkai naba ki bor Sorkar baroh kawei kin iadon bynta. Ta ka daw ngi pyrkhat ba donkam ban pynbun ia ka jingdon ki dkhot na ki Tnad treikam” ula bynrap.
Halor ka jingpynkhreh, u Myntri ula ong ba ka jingpyntrei ia ki madan ialehkai kila iaid bha hynrei ka jingpynbiang jaka sah ka dang dei ka jingeh ha ri-lum Garo bad ri-lum Jaintia.
“Ngi la shim ingkhein ia ki jaka sah ha ka Jylla jong ngi bad ngi sngew ba ha Shillong ngi la biang hynrei ia mynta, ngi don ka jingduna ha Tura bad Jowai, bad ngi la don ia ka plan halor kane bad ngi lah ai ia ka skhim na ka tnad Tourism ban seng ia ki Hotel kiba rit, ha kaba kumba 72-72 % yn ai subsidy na ka Sorkar” ula ong.
U bynrap ba kane ka sienjam ka dei kaba la shim ban kiar na ka jingpyntrei ia ki jingtei ki ban shem shitom ban pyniaid pat hadien bala kut ka lympung ialehkai.
“Ngim kwah shuh ban nang tei ia ki jingtei naba phi tip ba lada ngi bteng ban tei ia ki jingtei, kan long kaba eh shibun ia ngi ban pyniaid hadien ba kut ka National Games” ong u Bah Shylla.
“Ta ka daw ngi la shim ia kane ka kabu ban kyntiew ruh ia ka kam jngohkai bad ha kajuh ka por ba ngi ai ka lad ia ki trai shnong, kiba kwah ban seng ia kine ki hotel hynrei ngi la ai ha ki da ki kyndon ka ban pynlah ia ngi ban pynbiang jaka sah ia ki nongialehkai ne ki official ha ki sngi ban wan”.
U Bah Shylla ula iathuh ba ka Sorkar kam shym la ap ia ka song pisa na ka Sorkar Pdeng ban pyniaid shakhmat ia ki jingtrei.
U bynrap ba ka jingialang bishar kam da u Ministry of Sports ka Sorkar Pdeng ka long kaba sngewtynnad bha.
“Dang khyndiat bnai, u Secretary ka Sports Ministry ula wan shane bad lum ia ka jingialang bishar kam bad ula leit jurip ia ki madan bad ula pynpaw ia ka jingkmen bad dang shibnai mynta, u Commissioner & Secretary jong ngi ha ryngkat ki Ophisar kila iakynduh ia u Myntri ka Sorkar Pdeng ban batai ha u ia kiei kiei baroh. Baroh lang, nga lah ban ong ba ki jingpynkhreh kila iaid bha”.
Halor ka jinglh ialehkai bha ki nongialehkai, u Bah Shylla ula ong ba ka Sorkar ka kwah ban iaid palat ia kaba pynlong ia ka lympung bad ong “Ngi kwah ruh ba ki nongialehkai jong ngi kin ialeh bha”.
Ula kdew ia ka Meghalaya Outstanding Direct Appointment Policy kum kawei na ki jingmyntoi kiba heh bha.
“Naduh u snem ban wan, kino kino kiba wanrah medal na ka National Games, kin ioh ia ka kam Sorkar. Ka dei ka jingai mynsiem kaba khraw bha ia ki nongialehkai bad ia ki kmie ki kpa halor ka jingai jingkyrshan jong ki” ula ong.
U Myntri u pyntip ba naduh u snem bala leit, ka Sorkar kala pynlait haduh T.39 klur sha ki Sports Association bapher bapher ba kin pynkhreh ia ka lympung. U ong ba dei namar kine ki jingkyrshan b aka Jylla kala iohi ia ka jinglah ialehkai bha ki nongialehkai ka Jylla ha ka India Khelo Games. Ha u snem bala lah, ka kyrdan ka Meghalaya ha ka India Khelo Tribal Games ka long 29 hynrei mynta u snem kala poi sha ka kyrdan ba 13.
“Ngin iai bteng ban trei shitom bad ngin iai bteng ban kyrshan ia ki nongialam bad nga thikna ba ha u snem ban wan, ngin sa poi ha ka kyrdan top 5 bad kyrmeng ba ngin wan ruh hakhlieh duh” ula ong.
 ha Tura bad Jowai.){kind=link}