Shillong, Iaiong 28 : Ka Sorkar Jylla kan sa shna shen ia ka Rule ban pyntreikam ia ka Meghalaya Official Languages Ordinance, 2026, kaba ai jingithuh ia ka ktien Khasi bad Garo nalor ka English kum ka Official Language, pyntip u Symbud Myntri Rangbah ba khmih ia ka Parliamentary Affairs Bah Prestone Tynsong ha ka sngi Ba-ar.
“Naduh ka Sorkar MDA-I bad mynta ka Sorkar MDA-2, ngi lah shim ia ki rai kiba kongsan bad ban sah khana ha ka histori ha ka jingiaid lynti ban shakri ia u paidbah bad kawei na ki ka dei kaba dang shen, ngi lah shim ia ka rai ban pynurlong ia ka jingangnud u paidbah ka Jylla baroh kawei, la ka dei ki Garo, la ka dei ki Khasi bad Jaintia” ong u Bah Prestone haba iakren bad ki nongthoh khubor.
U ing ba ka Sorkar kala jied ban shim ia ka ktien “Official” ha ka jaka jong ka “Associate Official”.
“Haba kut haba ngi shim ia ka rai, ngi shem ba hooid balei ban ai Associate Official bad balei ym dei beit beit da ka Official ha ka jaka ka Officiate…kumta ngi la shim rai ba ka dei ban iaid Official Language Ordinance” ula ong.
U Bah Prestone ula pynthikna ba kane ka Ordinance kala ioh ia ka jingmynjur bad mynta kala dei ka ain.
“Nga sngewkmen ban pyntip sha phi ba hynnin ka sngi, u Lat ula ai jingmynjur ia ka Meghalaya Official Languages Ordinance, 2026 bad lah dep ban pynmih ha ka Gazette ka Meghalaya bad kala treikam badmynta shen ngin sa pynkhreh ia ki rule jong kane ka Ordinance bad khadduh ngin sa sdang ban pyndonkam ia kine ki ktien ha ki kam Sorkar” ula pynbna.
Haba kylli halor ka lynti ban pynlong ain, ula ong “Hooid, ia kane ka Ordinance yn sa rah sha Iingdorbar Thaw Ain ban pynlong ain ha u bnai Nailar-Nailur ha ka dorbar synrai ban wan”.
