Shillong, Iaiong 23 : Ki bor District ka East Khasi Hills kala pynjari mardor ia ka jingkhang tih syiap beain hapoh ka District halor ka nongrim ka jingsngewkhia ia ka jingpynjot ia ka mariang bad ia ka koit ka khiah ki nongshongshnong.
Ha ka hukum bala pynmih hapoh ka kyndon 163 jong ka Bharatiya Nagarik Suraksha Sanhita (BNSS), ka District Magistrate kala pynpaw ba ka jingkhlong shyiap haba bun ki jaka na ki wah-khamtam ha shilynter ka Wahniangleng ba don marjan ka Mylliem-kala sdang ban ktah jur ia ka tyllong um bam umdih bad ka jinglong ka mariang ha ka thain.
Kala pynpaw ba ka jingkhlong syiap pathar kala lam sha ka jingshah rong ka khyndew, ka jingpynjulor ia ki jingthung jingtep ha ki padun, ktah jur ia ki dohum dohwah, bad pynjaboh ia ka um, kaba pynlong ia ka um ba kan long ka bym shngain ban dih bad ban pyndonkam manla ka sngi.
Ka hukum ka pyntreikam biang ia ka hukum na ka National Green Tribunal (NGT), kaba bthah ba ym dei ban don ka jing tih par lane khlong syiap khlem ka permit kaba treikam, ka environmental clearance, bad ki licence kiba donkam hapoh ki ain ka Ri.
Haba pyntreikam iaka bor, ka bor District kala khang ia baroh ki jingtih par beain ha ki jaka padun, ban khlong ia u shyiap na ki wah khlem da ioh ia ka jingbit kaba biang.
Kala maham ba kano kano ka jingpynkhein ia ka hukum kan khring ia ka jingpynsajia kat kum ka ain.
Kane ka hukum kan treikam noh mardor ha East Khasi Hills baroh kawei tad haduh da pynmih da kawei pat ka hukum.
