Shillong, Iaiong 23 : U Nongialam ka BJP bad MLA ka Pynthorumkhrah Bah AL Hek ha ka sngi Palei ula ong ba ka BJP ka don jingthmu ban nang suhthied ha kylleng ka jylla Meghalaya hashuwa ka elekshon Assembly ha u 2028, haba buh thong ban jop 15 seat kynthup 5 seat na Shillong.
“La ka dei ka sor Shillong, East Khasi lane ri-lum Jaintia, ngin nang pyniar ia ka BJP ha ka Jylla baroh kawei” ong u Bah Hek haba iakren bad ki nongthoh khubor.
Ula ong ba ki nongtrei jong ka party kila treikam ha ki shnong ki thaw ban pynkhlain ia ka party.
“Baroh ki nongialam bad ki karyakartas kila treikam bha ban poi sha baroh ki jaka bad ki constituency khnang ba ha ka elekshon 2028, ka BJP kan lah ban leh bha” ula ong.
Haba kylli halor ka jingkhein antad ia ka jingjop, u Bah Hek ula ong “Ym duna ia ka 10 lane haduh 15 seat ngin jop. Ha shillong, ngin ioh san seat”.
