Shillong, Iaiong 23: Ka Khun Hynniewtrep National Awakening Movement (KHNAM) ha ka sngi Palei, kala phah ia ka dorkhas sha u Chief Secretary Dr Shakhil Ahmmed ba kynnoh ba ka don ka jingjied tang iala ki briew ha ka jingthungkam ia ki nongtrei bylla sngi da ka Secretariat Administrative Department (N) bad dawa ba dei ban shimkhia mardor ban pyndap ia ki kam kiba lait.
Ha ka shithi, u Working President ka KHNAM Bah Thomas Passah ula pyntip ba ka jubab lRTI na ka SAD(N), SAD(E) bad SAD(Accts) ka pyni ia ka jingdkoh ha ka rekod jong ka jingthungkam bad ka jingpynsangeh kynsan ia ki nongtrei Casual kiba la shakri la bun snem.
Katkum ka dorkhas, ka shithi kaba ha ka 20 tarik u Naiwieng 2025, la kdew ba ki don 107 tylli ki kam kiba lah mang ne Sanction kiba lait ha SAD(N), kiba kynthup ia ki 81 tylli ki kam Peon, 2 tylli ki kam Chowkidar, 2 tylli ki kam Mali, 17 tylli ki kam Cleaner bad 5 tylli ki kam Sweeper.
Ha kawei pat ka jubab na ka SAD(E) ha ka 26 tarik u Naiwieng 2025, la pyni ia ki 325 tylli ki kam kiba thylli kiba kynthup ia ki 137 tylli ki kam LDA, 128 tylli ki kam Typist, 32 tylli ki kam ha ka Stenographer Grade II, 17 tylli ki kam Stenographer Grade III bad 11 tylli ki kam Driver.
“Hadien ba la dep khmih bniah bha, ngi lah shem ba kitei ki nombar jong ki nongtrei bylla sngi naduh u Iaiong 2023 haduh u Nailur 2025 kaba la aiti da ka SAD(Accts) kam shim la iahap bad ka thup kaba la iohpdiang na u Under Secretary, SAD(N), ha katei kajuh ka por” la ong u Bah Passah ha ka shithi.
Ka seng kala pynpaw ba ka SAD(N) kala pyndonkam 121 haduh 139 ki nongtrei casual ha ka jingsiew ia ka dor bai bylla sngi man la ka bnai. Hynrei kala kam ba kumba 10 ngut ki nongtrei, kaba ka kyrteng ka paw man la ka bnai haduh u Naiwieng 2025, “kila jah noh” na ka thup kyrteng.
“Ngi lah sakhi ia ka kyrteng jong ki nongtrei, kaba ka kyrteng kadei kaba la kdew ha man la ki bnai khlem kano kano ka jingpep bad ngi lah ioh jingtip ba kidei ki bahaiing bahasem jong ki ophisar jong ka Tnad ne ki riewshimet kiba la thung da ki ophisar” la pynpaw ha ka shithi.
Ka KHNAM kala kynnoh shuh shuh ba kila don katto katne ki nongtrei casual kiba la trei palat ia ka 10 snem ha ka jingai jingshakri kila shah wengkam noh ha ka jaka ban shah thung noh ha ka kyrdan kum ki Regular Casual Worker (RCW) hapoh jongka Regular Casual Worker Scheme, 1996.
“Kila don ki khep ba ka tnad kala pynsangeh noh ia ka jingshakri ia ki katto katne ki nongtrei hynrei la khot biang ia ki hadien ka shi bnai ne ar bnai. Hynrei hadien u Naiwieng 2025 ngi lah sakhi ba kila don ki nongtrei ki bym shim la shah khot shuh, hynrei la khot thymmai noh da ki riewshimet ban mih bujli ha ki jaka jongki” la thoh u Bah Passah.
Ha katei ka dorkhas la bynrap ruh ia ki kyrteng jong kitei kumba 10 ngut ki nongtrei casual hapdeng ka Sl. No. 1 haduh 20 ha baroh ki Office Orders ha ki bnai kiba la dep haduh u Naiwieng 2025, kaba mut ba kidei ki nongtrei Casual kiba la ih ne trei slem ha ka jingshakri ia ka kam.
Katkum kane ka jinglap, ka KHNAM kala kyrpad ia u Chief Secretary ban peit ia ka jingmad jingeh jong ki samla ha kaban iohkam iohjam bad ia ki kam kiba lait thylli dei ban pyndap noh mardor.
Kala kyntu ruh ba kito ki nongtrei kiba la trei slem bad kiba lah rim ki bym shim la shah khot trei shuh hadien u Naiwieng 2025 dei ban khot biang ia ki namar ba kidei ki nongkamai ban pyndap pynbiang ia la ka iing ka sem.
“Ka long kaba donkam ban pynduhjait noh ia ka jingshah liang ha kaba iadei bad ka jingthungkam thungjam. Ka long kaba sngewsih ban iohi ba ki briew kiba don jingiadei kaba iajan bad ki ophisar ki iohkam iohjam katba kiwei pat ki shah kyntait” la pynpaw ha ka shithi.
 ha ka sngi Palei, kala phah ia ka dorkhas sha u Chief Secretary Dr Shakhil Ahmmed ba kynnoh ba ka don ka jingjied tang iala ki briew ha ka jingthungkam ia ki nongtrei bylla sngi da ka Secretariat Administrative Department (N) bad dawa ba dei ban shimkhia mardor ban pyndap ia ki kam kiba lait.){kind=link}