Shillong, Iaiong 23 : U Nongialam ka BJP bad MLA ka Pynthorumkhrah Bah AL Hek ha ka sngi Palei ula ong ba ka BJP ka dang iai plie ia ka jingkhang ia u Myntri Rangbah barim bad nongialam ka TMC Dr Mukul Sangma haba pynpaw ba u Dr Mukul u dang pan por ban pyrkhat ia ka jingtyrwa.
Haba kylli la u Dr Mukul ula kyntait ia ka jingtyrwa ka BJP, u Bah Hek haba iakren bad ki nongthoh khubor ula ong “Um pat ong hooid ne em hynrei ula ong ban ai por ia u ba un pyrkhat. Kumta, ngi dang ai ka lad ia u ban pyrkhat”.
Haba kylli la ka party kan iakren biang ia une u Nongialam ka Liang Pyrshah, u Bah Hek ula ong “Ngin sa iakren ia u ha kano kano ka por, kam slem shuh. Kam don jingeh satia ia ngi, ka BJP”.
Ula pyntip ba ka BJP kala iakren ruh bad u Dr Mukul ha u snem bala lah haba pyntip ba kane ka jingiakren kam kut satia tang ha u Dr Mukul.
“Man ka por, ngi la iakren ia kiwei kiwei ruh, ym tang ia u hynrei ki nongialam na kiwei ki seng sain pyrthei” ula ong.
U bah Hek ula pyntip ba ki nongialam na ki seng riewlum bad ki national party kila iakren bad ka party bad kila pynpaw ia ka jingkwah ban iasoh hashuwa ka elekshon MLA 2028.
“Haduh mynta, saw ngut ki MLA kila iakren bad nga” ula ong haba kyntait ban iathuh ia ka kyrteng jong ki lane ka party ba ki don.
“Ka jingkhang jong ka BJP ka dei kaba plie beit. Kam pher ki wan katto katno ruh, ngin pdiang beit ia ki” ula bynrap.
