Shillong, Iaiong 23: U Director ka Drug Reduction, Elimination & Action Mission (DREAM) Bah Francis Kharshiing ula ong ba ka jingpyndonkam ia u drug ha Meghalaya lah ban pynduna bha wat ban pynduhjait hapoh jong ka 5 snem, lada baroh kiba don bynta lang kynthup ia ki tnad sorkar bad ia ki paitbah, ki iashimbynta ha ka mission.
“Ka jingpyndonkam ia u Drug ha ka jylla kadei kaba lah bha ban pynduna bad wat ban pynduhjait noh hapoh jong ka 5 snem, lada baroh kiba donbyntalang kynthup ia ki tnad sorkar bad ia ki paitbah kin iashimbynta bha ha ka mission” ong u Bah Kharshiing haba kren ha ka Conference on drugs and substance abuse ha West Garo Hills District hynne ka sngi Palei.
Ula banjur ia ka jingkongsan ban donlang ia ka jingkitkhlieh ha kaban iakhun ia kane ka jingeh.
“Ka jingiatreilang bad ka jingiadonbyntalang u long u shabi ban shimkhia tyngeh ia ka jingeh na ka jingpyndonkam ia u drug bad ia ki jingdih kiba sniew” ula bynrap.
U Bah Kharshiing ula ong, ba ka mission ka donkam ia ka jingiatreilang hapdeng ki tnad bapher bapher bad ban pynneh ruh ia ka jingiatreilang bad ka imlang sahlang ha kaban tehlakam ia ka jingpyndonkam ia u drug ha Meghalaya.
Haba ai jingkren ha ka jingialang, ka Chairperson jongka Meghalaya State Commission for Protection of Child Rights ka Agatha K Sangma kala pynpaw ia ka jingsngewkhia halor ka jingsuk ha kaban ioh ia ki jingdih pynbuaid kiba sniew bad ia u duma hapdeng ki khynnah.
Kala kdew ba ka Meghalaya kaba dei ka jaka kaba don hajan jong ka “Golden Triangle” kaba la pynlong ban mad ia ka jingeh na ka jingwan iaid lyngba ka khaii be-ain ia ki jingdih kiba sniew sha ki jylla kiba marjan bad ki ri, kaba la nang pynsiew shuh shuh ia kane ka jinglong jingman.
Haba banjur ia ka jingiada ia ki khynnah, kala pynpaw ia ka jingdonkam kyrkieh ban pynsngewthuh ia ki paitbah, ban iada bad ka jingkhlain jong ka jingshimkhia mardor ki jaka pule ban iada ia ki khynnah rit na ka jingkyrni.
Ia kane ka jingialang la pynlong da ka Meghalaya State Commission for Protection of Child Rights ha ryngkat ka jingiatreilang bad ka District Social Welfare Office bad ka District Child Protection Unit, da ka jingthmu ban pynthikna ba kan don ka jingiatreilang hapdeng ki tnad bapher bapher ha kaban iakhun pyrshah ia u drug bad ia ki jingdih kiba sniew ha ka district.
Ha kane ka jingialang la ioh ruh ia ki jingbatai kiba kyrpang da kaba phaikhmat halor ka jinglong jingman kaba mynta jong ka jingpyndonkam ia ki jingdih kiba sniew ha West Garo Hills, ka jingai jingkren na kito kiba la lait na ka jingkyrni ha ki jingdih bad ki sienjam kiba dang iaid shakhmat ban pynduna ia ka jingngop bad jingkyrni bad ban kyrshan ia ki riewshimet ban sah ha ki Rehab.
Ha kane ka jingialang la wan ruh ban sakhi da ki ophisar na ki tnad bapher bapher, ki dkhot jong ki sengbhalang kiba trei ha kane ka bynta, ki nongmihkhmat na ki Local Development Committee, kaba pyni ia ka jingshim ia ka jingkitkhlieh ban shimkhia ia kane ka mat.
La pynkut ia ka jingialang da kaba shim ia ka rai ban pynneh beit ia ka jingiatreilang, ka jingdonbyntalang jong ka imlang sahlang bad ban pynjur ia ki sienjam ban iakhun tyngeh ia u drug bad ia ki jingdih kiba sniew bad ban iada ia ki samla jong ka district.
 Bah Francis Kharshiing ula ong ba ka jingpyndonkam ia u drug ha Meghalaya lah ban pynduna bha wat ban pynduhjait hapoh jong ka 5 snem, lada baroh kiba don bynta lang kynthup ia ki tnad sorkar bad ia ki paitbah, ki iashimbynta ha ka mission.){kind=link}