Pyntreikam ka NEC palat T.1,496 klur ha u 2025-26 | Hiar ka jingkitkam sha ka 53% | Hiar ka UC ba sahteng haduh 97%

Shillong, Iaiong 22: Ka North Eastern Council (NEC), kaba dei ka tnad kaba khmih ia ki 8 tylli ki jylla jong ka thain shatei lammihngi ka ri kala pynlut haduh T.1,496.78 Klur ha u snem mang tyngka jong u 2025–26, kaba la long ka rekod bad kaba long ruh u snem uban sah jingkynmaw ia ka thain.

Kane ka jingpynlut ka kynthup ia ka T.792.12 Klur hapoh jong ka Schemes of NEC (SoNEC) bad T.704.66 Klur hapoh jong ka North East Special Infrastructure Development Scheme – Roads (NESIDS-Roads).

“Ka rukom treikam ka NEC mynta u snem kala pyni ia ki dak ki shin ba kala don ka jingkiew sted ha ka roi ka par jong ka thain shatei lammihngi” la pynpaw ka
Council.

Ha u snem 2025–26, ka NEC kala bhah ia ki 54 tylli ki projek kiba thymmai kaba kot T.435.22 Klur ka kynthup ia ka jingpule ha ka Higher Education, ki jingtei ha kaba iadei bad ka koit ka khiah, ki karkhana, ka rep ka riang bad ka rep syntiew, ki kam jngohkai, ki lad kamai jakpoh bad ka jingpynneh pynsah ia ka kolshor.

Kane kadei kaba heh tam ha ka shi snem ha ka jingiaid jong ka 15th Finance Commission. Sa 162 ki kam kiba hap ha ka Non-Project kaba kot T.24.06 Klur kaba kynthup ia ki tamasa kolshor, Seminar bad ki Awareness Programme kidei kiba la bhah tyngka. Ka jingbhah kaba thymmai na ka bynta u snem ka long T.459.28 Klur.

Mynta u snem ruh lah iohi ba 136 tylli ki projek kiba shongdor T.678.85 Klur kidei kiba la pyndep, ka jingpyndep kaba heh ha ka sien ka baar ha kane ka jingpyniaid ia kane ka Finance Commission.

Nalor kane, 161 tylli ki Non-Project kaba shongdor T.17.28 Klur lah pyndep kaba la lam sha baroh ki jingmih na ka bynta u 2025 na ka 26 sha ka 297.

Hapoh jong ka NESIDS-Roads, ka Ministry of Development of North Eastern Region kala mang na ka bynta 64 tylli ki Road Project kiba shongdor T.3,037.39 Klur na ka bynta baroh 8 tylli ki jylla ha ka 15th Finance Commission, ha kaba 30 tylli ki projek kidei kiba shongdor T.1,123.08 klur kidei kiba la pyndep.

Tang ha u 2025–26, ka jingpynlut ha ka NESIDS-Roads kala long T.704.66 Klur kaba kynthup ia ki jingkieng ha ki wah kiba heh bad ka jingshna pynheh ia ki surok ha ka thain shatei lammihngi.

Ka NEC Secretariat kala pynlong 405 sien ia ka jingleit jurip ia ka jingpyntrei ia ki projek ha une u snem.

“Kane ka jingleit jurip kan pynthikna ba ka rukom tei kan dei kaba iaid bad bud katkum ka kyrdan, ban pyndep ha ka por kaba la buh bad ban ruh ha ka jingkitkhlieh da kiba pyntrei ia kine ki kam” ka la ong.

Kawei na ki jingseisoh ha ka jingshakri kadei ka jinglah ban pynduna ia ka Financial Liabilities bad Utilisation Certificate (UC).

Ka Committed Liabilities kala hap na ka T.1,743.48 Klur ha ka 1 tarik u Iaiong 2022 sha ka T.813.17 Klur ha ka 31 tarik u Lber 2026 — ka jingkhate kaba la palat ia ka 53% ha ki 4 snem. Ki UC kiba dang sahteng kila hap na ka T.440.82 Klur haduh ka 1 tarik u Iaiong 2025 sha ka T.10.94 Klur ha u Rymphang-Lber 2026, ka jinghap kaba la palat ia ka 97% hapoh jong uwei u snem mang tyngka.

“Kane ka pyni ba ka NEC kala pynjur ia ka jingpynleit jingmut ha ka jingshim ia ka jingkitkhlieh ha ka pisa pilain bad ka jingbud ryntih” la ong ka Council.

U Secretary ka NEC, ula phah ia ka jingai khublei kyrpang ia ki sorkar jylla bad ia ki kynhun kiba pyntreikam halor ka jingshim ia ka jingkitkhlieh jongka jingiatreilang ha kaban kyntiew bad ban buh hakhmat eh ia ki kam pynroi ha ka thain shatei lammihngi.

Ka Council kala iaroh ba lyngba ka jingiohi jngai bad ka jingbtin jong u Chairperson ka NEC (u Myntri Kam Pohiing ka Ri) bad u Vice Chairperson ka NEC (Myntri ka Sorkar Pdeng uba khmih ia ka Development of North Eastern Region) halor kane ka jingkiew shaphrang.

“Ka NEC kala pynpaw ba kan iai bteng ban trei ryngkat lang bad ki jylla ka thain shatei lammihngi ban iarap ha kaban pynurlong ia ka jingiohi jngai jong ka Viksit North East hapoh u snem 2047, kaba iaid ryngkat lang bad ka jingangnud bad ka jingiohi jngai jong u Myntri Rangbahduh ka ri ban ioh ia ka Viksit Bharat hapoh u snem 2047” kala ong.