Shillong, Iaiong 22: U Myntri ka Pule Puthi u Bah Lahkmen Rymbui ula phah da ka jingthoh sha u Myntri ka Sorkar Pdeng uba khmih ia ka pule puthi ba kynthup noh ia ka Ktien Khasi bad Garo ha ka Central Board of School Education (CBSE) Scheme of Languages bad ka maham ba ki khynnah pule ka Meghalaya kin mad ia ka ‘jingduhnong’ hapoh jong ka ‘Three-Language Policy bathymmai jong ka Board naduh u 2026–27.
“Dang shen ka CBSE kala bthah ba ia ki 3 tylli ki ktien– R1, R2 bad R3 bad ha ka Scheme of Language ka CBSE, Khasi bad ka Garo kim don satia. Kumta kan long kaba eh bha ia ki khynnah pule ka Meghalaya namar ba ia ka Khasi bad Garo ym shim la kynthup lang ha ki 44 tylli ki ktien ha ka CBSE,” ong u Bah Rymbui haba iakren bad ki nongthoh khubor ha ka sngi Balang.
Ula ong, ba ka Khasi bad Garo kadei kaba la ai ha ki skul CBSE tang haduh ka klas VIII, kumba la bthah da ka RTE bad ka National Education Policy na ka bynta ki ktien tynrai ne Mother Tongue Instruction ha ka Elementary Level. Hynrei hapoh jongka polisi thymmai ka CBSE, 3 tylli ki ktieng kin long kiba kongsan naduh ka Klas VI naduh u snem 2026–27 bad ki Board Exam ha baroh 3 ha ka Klas X naduh u snem 2031.
“Ka jingeh ka long, kaei ka ktien kaba kin shim bad ia ka eksam yn pynlong ha ka R1, R2 bad R3, kumta kan don ka jingeh ia ki khynnah pule ka Meghalaya kiba pule ha ki skul kiba la ioh jingithuh da ka CBSE kum ka JNV, KV bad kiwei kiwei ki jaka pule shimet” ula ong.
U Bah Rymbui ula ong, ba ki don 9 tylli ki skul kiba la pyniasoh bad ki CBSE hapoh ka jylla, nalor ka Jawahar Navodaya Vidyalayas, Kendriya Vidyalayas bad artylli ki Eklavya Model Residential Schools kiba la treikam ha Pahamsyiem bad Samanda. Kin don sa 36 tylli ki EMRS kiba dang dei kiban iaid shakhmat.
“Palat ia ka 2000 ngut ki khynnah pule man la ka snem kin ialeh ia ka eksamin jong ka CBSE” ula bynrap.
U Myntri ula ong, ba ula rah mardor ia kane ka mat bad ka CBSE hadien ba kala pynmih ia ka jingpynbna.
“Hadien ba kala mih ka jingpynbna na ka CBSE, Nga lah shim ia ka por, nga lah iakynduh ia u Chairman ka CBSE bad pynsngewthuh ia u ba lada kam don ka ktien Garo bad Khasi ha ka Scheme of Language jongka CBSE, ki khynnah pule ka Meghalaya kin mad ia ka jingeh kaba khraw”.
Ula bynrap ba ka kynhun myntri ha ka 16 tarik u Iaiong kala rai ban pynlong ia ka ktien Khasi bad Garo kin long noh ki Official Language ka Meghalaya.
“Nga lah phah da ka jingthoh sha u Myntri ka Pule Puthi, nga lah iakynduh ia u Chairman ka CBSE bad ngan bteng (ban shimkhia ia kane ka mat) bad nga ngeit skhem ba ha ki por ban wan ba ka Sorkar India, ka NCERT kan sa pynkhreh ia ki kot bad ka CBSE kan ioh ban wanrah ia ka ktien Khasi bad Garo,” ong u Bah Rymbui.
“Kumba long mynta, lada ngim don ia kino kino ki kot ki sla, nga lah ai jingmut balei bym pyndonkam noh da ki riewstad jongka MBOSE halor kane, ha kaba iadei bad ka ktien Garo bad Khasi khnang ba ki khynnah pule kin ioh jingmyntoi”.
U Bah Rymbui ula ong, ba ka jingkynthup kan thaw ia ki lad ban iohkam iohjam bad ban pynkhlain ia ka jingdawa pynrung noh ha ka Eighth Schedule.
“Lada ia ka ktien Khasi bad Garo la ai jinghikai ha kine ki skul, kan plie ia ki lad ki lynti jong ka jingiohkam ha ki skul ki bapher bapher” ula ong.
“Ngi lah ban lah ha kaban pynkohnguh ia ka Sorkar Pdeng kaban pynsngewbha katkum ka Resolution jong ka Sorkar Meghalaya ban kynthup ia ktien Khasi bad Garo ha ka Eighth Schedule jong ka riti synshar ka India”.
“Nga don ia ka jingkyrmen kaba skhem ba ngan lah ban pynkohnguh ia ka Sorkar Pdeng bad ka CBSE ha ki por ban wan, ia ka ktien Khasi bad Garo yn sa hikai ha ki skul kiba la pyniasoh bad ka CBSE” ula bynrap.
 Scheme of Languages bad ka maham ba ki khynnah pule ka Meghalaya kin mad ia ka ‘jingduhnong’ hapoh jong ka ‘Three-Language Policy bathymmai jong ka Board naduh u 2026–27.){kind=link}