Nongstoin, Iaiong 22 : Uwei u Rangbah ula pyniap iala u jong u khun pyrsa da kaba pom da ka wait bnoh katba u dang wan na skul ha ka shnong Umdang, kaba hap hapoh ka Shallang Police Station, West Khasi Hills.
Kat kum ka khubor Pulit, une u rangbah u kyrteng u Imphal Mawsor bala 50 snem ka rta.
La iathuh ba une u briew ula thombor ia u khun pyrda ba dang 3 snem shiteng da ka wait bnoh katba u dang wan na skul bad jan poi iing artad. Une u briew ula pom ia une u heprit na ki bynta jong ka khlieh, kaba pynlong ia une u heprit ban iap hashen.
Ki Heh Pulit kynthup u Sub Divisional Police Officer (SDPO) ka Mawshynrut bad ki Pulit ka Shallang Police Station kila hiar mar mar sha katei ka jaka ban pynlong ia ka jingtohkit.
Ka kynhun Forensic Crime Scene Unit kila poi lang ha katei ka jaka ban lum ia ki sakhi satar.
Ki Pulit kila kem noh ia une u briew bad ia ka met jong une u khynnah lah pynkot noh sha Civil Hospital, Nongstoin ban pyndep ia ka post mortem. Ka jingtohkit mynta kala iaid shakhmat.
