Shillong, Iaiong 22: Ka kynhun ialehkai ka Balmanduri FC ka la lah ba kan pynliem da 7-1 ia ka Attong Matgrik FC ha ka jingiakhun jong ka Group G ka lympung ialehkai 5th Meghalaya State League ba long ha Williamnagar hynne ka sngi Balang.
Kane ka dei artad ka jingiakhun ba tang kawei kaban long mynta ka sngi jong kane ka lympung, ha kaba ka kynhun ialehkai ka Balmanduri kaba dei na ki bynta jong ka North Garo Hills, ka la sdang ban iuh kjat ha kane ka lympung da ka nam rem, ha ka jingialehkai kaba nyngkong kaba la long myn ha ka 18 tarik mynta u bnai.
Hynrei hynne ka sngi, kane ka kynhun ka la lah ialehkai bha ban ioh ia ka nam jop, ha kaba tang haduh ba kut ka kylla step, ka la lah ba kan ioh thep haduh saw tylli ki kol kiba la wan lyngba u Goodnear Marak (21′), Jurisbirth Marak (30′), Ganapati Rabha (41′) bad kumjuh na u kapten u jong ka u Chichang M Momin (45′).
Haba wan ban bteng ia ka kylla miet, u Rabha (70′) bad u Dipunjay Rabha (75′), kibala wan mih na ka ben shong ka jong ki ban thep pat sa ia kine ki artylli ki kol bad u Jurisbirth u la ioh ban thep sa kawei pat ka kol ha ka minit 81.
Na ka liang ka Attong Matgrik, ia ka shi kol ban lait brut ka jong ka na kane ka jingiakhun la thep ia ka da u Sunil M Marak ha ka minit kaba 85.
Lashai pat ka sngi, kan don tang kawei ka jingiakhun kaba dei jong ka Group G ban iakhun hapdeng ka A’chik SCO Rongjeng pyrshah ia ka Janepih YSCA kaba la buh ban long ha ka por 3 baje nohphai sngi.
