Guwahati, Iaiong 21: U Pawan Khera, nongïalam ka Congress, ha ka sngi Nyngkong, u la leit sha ka Gauhati High Court ban pan anticipatory bail ne pan jamin lypa ha kaba ïadei bad ka case ba la register pyrshah ïa u da ka lok jong u Myntri Rangbah ka Assam, u Himanta Biswa Sarma, halor ka jingkynnoh ba ka don bun tylli ki passport bad kiwei de jingjingdon jingem.
Kane ka sienjam ka la wan hadien katto katne sngi ba ka Supreme Court jong ka Ri India ka la kyntait ban ai jingiada shipor ia u na ka jingshah kem bad bthah ia u Khera ban leit sha ka iingbishar kaba tbit ha Assam ban ioh jingpynlait.
Ka ïingbishar ba ha khlieh duh ka la pynsangeh ruh ïa ka jamin ba la ai lypa da ka Telangana High Court’s bad ka la pynshai ba ka Gauhati High Court ka dei ban rai ïa kane ka kam da lade, khlem da shah ktah ha ki jingpeit bniah ba la dep.
Ka thma ktien ka mih na ki jingkren ba la kren da u Khera ha shwa ka Assembly elekshon kaba dang shen, ha kaba u la kynnoh ba ka lok jong u Sarma ka don ïa ki passport na UAE, Egypt, bad Antigua bad Barbuda, bad ka la ïoh ïa ka jinglong nongshong shnong bar ri hapdeng u snem 2021 bad 2022.U la kam ruh ba u Myntri Rangbah um shym la pynpaw ia ki jingdon jingem shabar ri ha ka election affidavit jong u.
U Sarma bad ka tnga jong u, ki la kyntait ia ki jingkynnoh, da kaba ong ba ki dei kiba la shna thok bad kiba ialam bakla. Ki la kynnoh ba kitei ki jingkynnoh ki dei kiba la pynshong nongrim ha ki tiar kiba la shna thok ne kiba la shna da ka AI generated bad ki la wad ïa ka jingsdang jong ki na kawei ka YouTube channel jong ka Pakistan.Hadien kata ka lok jong u Sarma ka la sdang ïa ka jingshah pynngat ha ka kam runar bad ka jingpynjah burom pyrshah ïa u Khera.
Ha kajuh ka por, ka ïingbishar jong ka Guwahati ka la kyntait ïa ka jingkyrpad jong ki Pulit ka Assam ban ai ïa ka non-bailable warrant pyrshah ïa u Khera ha kajuh ka case. U Nongbishar ba rangbah jong ka Kamrup Metro, ha ka hukum jong ka 7 tarik u Iaiong, u la ïohi ba ki nongrim ba la kdew da u investigating officer ki long “ba la pynshong nongrim pura ha ki jingmutdur” bad ki duna ïa ki sakhi kiba kyrshan.
