Shillong, Iaiong 21 : Ki kynhun bapher bapher jong ki skul deficit bad ki college ha ka Jylla, kila kyntait ia ka Meghalaya Non-Government School and Colleges Employees Centralised Fund Scheme, 2026, haba dawa ia ka Sorkar ba kan leh ia kiei kiei kat kum ki kyndon ain bad na ka bynta ka jingmyntoi ki Nonghikai bad ki Nongtrei, khamtam kito ki nongtrei kiba la shongthait kiba mad jingeh ha ka pisa tyngka.
Haba kren sha ki nongthoh khubor ha ka sngi Ba-ar, u President ka Khasi Jaintia Deficit School Teachers Assocation (KJDSTA) Boswell Pala ula ong “…Ngi pdiang bad sngewnguh ia ka jingpynbna u Myntri Rangbah ka Jylla ha ka 1 tarik Iaiong ba iadei bad ka jingpyntreikam lang ia ka skhim pension haba ithuh ia ka jingsynniang ki nonghikai, khamtam kiba saindur ia ka jabieng ki khynnah. Kane ka pyni ia ka jingaiti sha ka bha ka miat ki nonghikai bad ka kam pule pule”.
“Hynrei, kum ka kynhun, ngi pynpaw ia ka jingsngewkhia kaba jur halor ka jingpynbna jong ka Pension Scheme 2026. Hadien ka jingiasyllok kaba bniah bad ki Association bapher bapher, ia kane ka skhim la kyntait bad ka jingpyrshah jong ngi la dep ruh ban aiti da ka jingthoh ia ka Sorkar” ula bynrap.
U Bah Pala ula ong ba kane ka skhim ba mynta ka iapher na ka draft kaba rim.
“Ka long kaba donkam bna pynshai ba ha ka draft barim jong ka skhim ha u snem 2023- kaba la iakren sani bha bad ki kynhun bapher bapher bad la aiti ruh da ka jingthoh sha ka Iingkashari-ka iapher bha bad ka PensionScheme u 2026 kaba la pynmih jingpynbna mynta” ula ong.
U ong ba ki sienjam ban pyntreikam lah leh wat hapdeng ka jingpyrshah bad ka jingsahteng ka mukotduma.
“Wat hapdeng kane ka jingkyntait lang, bad katba kane ka kam ka dang sah ha ka jingbishar, ka Sorkar kala pyniaid shakhmat bad ki sienjam ban pyntreikam ia ka. Ia ka jingpynbna lad dep ban pynmih ba bthah ia ki kynhun bapher bapher, kynthup kito kiba la shongthait bad ki nongtrei ba dang don ha ka kam, ba kin plie ia ka PRAN Account ha kane ka rukom treikam ba thymmai” ong u Bah Pala.
“Kane ka pynmih ia ka jingsngewkhia kaba jur, naba kum kine ki jingleh ki lah ban pynbor ia ki kynhun ba don bynta ban rung ha ka Pension Scheme 2026 bad ka lah ban pynkylla ia ka hok ioh pension jong ki” ula bynrap.
U Bah Pala ula ban jur ba ki ain bala don lypa mynta kila tehlakam ia kinongtrei kaba la pynshong nongrim halor ka sngi ba thungkam ia ki.
“Ngi pynpaw da kaba burom ba ki kynhun ba don bynta kiba la rung sha ka kam hashuwa u Iaiong 2010 ki dei kiba hap hapoh ka kyndon jong ka Meghalaya Non-Government Schools and Colleges Employees Centralised Provident Fund Act, 1969. Kito kiba thingkam hadien ki hap hapoh ka National Pension System, kumba la pynbna kham hashuwa ha u bnai Jymmang 2023 bad ha ka Official Gazettre u bnai Rymphang 2025. Ka Pension Scheme u snem 2026 kam shym la lah ban pynneh ia kane ka jingpyniapher kaba kongsan ha ka liang ka ain” ula ong.
