Imphal, Iaiong 17: Kumba 21 ngut ki riew paidbah ki la mynsaw, bad san ngut ki briew ki la shah kem hadien ba la mih ka jingklumar ba thymmai ha Bishnupur district jong ka jylla Manipur ha ka sngi Palei.
Katkum ki report, ka jingiakynad ka la mih haba ki nongiakhih ki la khanglad ia lai tylli ki kali shimet kiba kit ia ki shipai pahara kiba don tiar ialeh kiba phong da ki jain paidbah.
“Katei ka jingjia ka la jia ha ka por 1:30 baje mynstep hajan Thinungei ha kaba ki trai shnong ki la khanglad ia ka jingleit jingwan jong ka kynhun ki bor pahara hadien ka jingmih khubor shaphang ka jinglong bad ka jingthmu jong kito kiba don hapoh ki kali”, la ong uwei u heh pulit.
Ka kynhun jong ki paidbah kiba la iawan bad ia lum lang ha kajuh ka jaka ki la pynsangeh ia ka kali.Ka jinglong jingman ka la nang jur shuh shuh haba ki don ki riew shimet kiba la kylla leh shongshit bad donbor, da kaba thombor ïa ki kali bad la thang ia ar tylli na ki, la bynrap shuh shuh une u heh ophisar.
Ban teh lakam ia kane ka jingklumar la wanrah shuh shuh ia ki bor pahara jong ki pulit sha katei ka jaka ban tehlakam ia ka jinglong jingman, kaba la pynlong ia ka jingiaklumar hapdeng ki bor pahara bad ki nongiakhih.
Ki pulit ki la iathuh ba ym duna ia ka 21 ngut ki nongiakhih pyrshah ki la mynsaw malu mala ha katei ka jingjia, katba san ngut ki riew shimet ki la shah kem.
Hadien kane, u district magistrate u la pynjari da ki hukum ban khang katkum ka kyndon 163 jong ka Bharatiya Nagarik Suraksha Sanhita naduh ka por 5 baje mynstep haduh ban da pynbna da kumwei pat, da kaba khanglad ia ka leit ka wan jong ki paidbah ha katei ka jaka.
Ka jingkulmar ha katei ka District ka dang jur bha naduh ka 7 tarik u Iaiong, ha kaba ka jingshah thombor kaba la suba ba ka dei ka kynhun kaikhlaw na ka shnong Tronglaobi, kiba la pyniap ia arngut ki shipara bad ka kmie jong ki, kaba la mynsaw jur.
