Pynthikna biang ban nym don jingtei eiei ha dewlynnong
Shillong, Iaiong 16 : U Myntri Rangbah ka Jylla Conrad K Sangma ha ka sngi Palei ula ong ba ka Sorkar kan sa pynlait ia ki kot ki sla halor ka kam Lumpongdeng, haba pynskhem ba kam don satia kano kano ka jingmut ban tei eiei ha dewlynnong Lumpongdeng bad kyrpad ia u Chairman ka Green Tech Foundation ba un sangeh noh ia ka jingshah thngan.
Haba kylli la ka Sorkar kan pynshai ia kane ka kam lyngba ki kot ki sla hadien ba u Chairman ka GTF ula kyntait ban pynkut ia ka jingshah thngan haba dawa ban pynduh pyndam noh ia ka tourism project, u Conrad ula ong “Hooid kam don jingeh, ngin sa ai ia ki”.
Halor ka koit ka khiah u nongiakhih, ula ong ba ka kynhun nongsumar kila peitthuh bha ia ka jinglong jingman.
“Ngi la bthah ia ka Tnad ka Koit ka Khiah ba kin leit ai jingiarap. Ngi la peit thuh bha naduh hynnin janmiet bad la iathuh ia nga ba lah khmih ruh ki doktor ia une u nongiakhih” ula ong.
U Conrad ula iai ban biang ba ka jaka ban pyntrei ia ka project kam jngohkai (Taj Umiam Resort & Spa) kam dei satia ha dewlynnong Lumpongdeng.
“Ngi la dep kren shai bha sha ki bad sha ki paidbah ka Jylla ba kam don jingtei eiei ruh em hangtei. Ka jingtei kan mih ha ka jaka kaba ieng ka Orchid Hotel ba mynta, kaba dei ka Umiam, hangne yn shna ia ka five-star hotel” ula ong.
“Ka jingeh ba ki don, ka long ia ka jingtei ha dewlynnong Lumpongdeng, ia kaba la dep ban pynshai kdar bad baroh kila hun halor kane ka bynta. Kumta, ngam iohi ban don eiei shuh bad namar kata, kam don nongrim shuh ruh ia ki ba kin bteng ia ka jingiakhih namar ia ka jingsngewkhia jong ki lah dep ban pynbeit” ula ong.
Halor ka jingtynruh ban kyntiew ia ki kam jngohkai, u Conrad u iathuh ba ka Taj Group kala wanrah ia ka jingkynshew pisa ba palat T.300 klur.
“Kan dei kaei na ki resort ba biang duh, lada kam dei hapoh ka ri hynrei kaba biang duh ha ka thain lam Mihngi” ula ong/
