Shillong, Risaw 27 : Ka Federation of Khasi Jaintia & Garo People (FKJGP) kala dawa ia ka Sorkar Jylla ba kan kyntur ia ka nursing recruitment policy ba iahap kat kum ki nongpang ha NEIGRIHMS hadien ba 174 na ki 194 ngut ki Nursing Officer bala shah jied ha ka jingthungkam ba khatduh la lap ba ki dei ki shynrang.
U President ka FKJGP Central Body Bah Dundee Cliff Khongsit ha ka shithi sha u Commissioner & Secretary ka Tnad ka Koit ka Khiah Dr Joram Beda, uba dei ruh u dkhot ka NEIGRIHMS Governing Council, ula ong ba ka bhah thungkam ba 80:20 ia ki kynthei bad shynrang bala pyntreikam ha AIIMS, JIPMER, PGI bad kiwei ki Institute ka Sorkar Pdeng, dei ban pyntreikam lang ha NEIGRIHMS.
Ka FKJGP kala pynksan ba ka NEIGRIHMS ka shakri ia ki kynthei, ki khynnah bad bad ki kynhun kiba donkam jingïada kyrpang, kiba bunsien ki donkam ïa ka jingsumar kaba burom ïa ki jingdonkam bad jingsngew jong ki kynthei. Hynrei, ka la ong ba ka histori ha ka thungkam ha katei ka jaka ka la pyni ba ki shynrang ki kham bun ban ïa ki kynthei.
“Ha ka jingthungkam Nursing Officer kaba heh tam ha NEIGRIHMS ba khatduh, la pynbna laitkam haduh 194 tylli ki kam, hynrei na kine, 174 ngut kiba la shah jied ki dei ki shynrang, kaba long jan 90 percent na baroh kiba shah thung kam,” ong ka Federation, haba bynrap ba kane ka la ktah ïa ka jingsumar ba rieh, ka burom bad ka jingsngew suk jong ki nongpang katkum ka kolshor jong ki.
Ka la ong ba mynta ka NEIGRIHMS ka don 549 ngut ki Nursing Officer, ha kaba 317 ngut ki dei ki kynthei bad 232 ngut ki dei ki shynrang, kaba la pynmih lypa ïa ka jingbym ryntih ha ka jingdon jong ki nongsumar ha ki jaka kha khun, ka tnad Obstetrics and Gynaecology (O&G), ki ward jong ki nongpang kynthei, ki tnad sumar khynnah bad ki Neonatal Intensive Care Unit (NICU) na ka bynta ki khyllung ba dang kha.
Ka seng ka la maham ba da ka jingbun ki nurse kynthei jong ka batch 2006-2008 ki ban sa shongthait noh, kane ka rukom pyniaid kam kan nang ktah jur lada ym lah ban pynbeit noh.
