Yn pyniaid shakhmat ia ki mining plan bala dep ioh jingmynjur : CM
Shillong, Iaiong 16 : U Myntri Rangbah ka Jylla Conrad K Sangma ha ka sngi Palei ula ong ba ka Sorkar Jylla kala buddien ia ka amendment bad ka Sorkar Pdeng halor ka kyndon 100 hectare ban tih dewiong ha Meghalaya, hynrei katbym pat don jingkylla, kan pyniaid shakhmat bad ki mining plan bala dep ai jingmynjur da ki bor khmih ka Sorkar Pdeng.
“Ngi la iakren bad ka Sorkar India. Ngi la kyrpad ia ka Sorkar India ba kan pynkylla ia kane ka bynta (kyndon 100 hectare)” ong u Conrad haba jubab ia ka jingdawa ki nongtih dewiong ka ri-lum Jaintia ia ka mining policy kaba iahap bad ka rukom long rukom man ki jaka jong ka thain.
U Myntri Rangbah ula batai balei ba ka Jylla kala mynjur ban pyniaid beit shakhmat bad kane ka jingpynbeit ba mynta.
“Ka daw hi ka long ba ha katei ka por haba buh ia ka kyndon 100 hectare, ha ka jaka ba ngin iasaid bad pyrshang ban pynkylla ia kine kiei kiei, ngi sngew ba ka log kaba donkam ban pynlait shuwa na ka jingshah khang bad ba ngin sdang shuwa ia ki kam tih dewiong bad ioh katto katne ki licence. Ngi la jam shakhmat bad ngi la ioh ia ki” ula pynpaw.
“Mynta, ka bynta kaba ar bad ka sienjam ka long ban ioh ia kaei kaba phi la pynpaw (pynkylla ia ka kyndon 100 hectare)” ula bynrap haba pyntip ba ka Sorkar kala shimkhia bha ban iakren ia kane ka kam sha New Delhi.
U Conrad ula pynpaw “Nga don jingkyrmen ban gin ioh ia ka jubab kaba sngewtynnad hynrei phi sngewthuh ba ka donkam ban leh bun ki homework, shibun ki jingiakren ha ki kyrdan bapher bapher ka Sorkar India bad ki jingiakynduh ia ki Ophisar bapher bapher, iakynduh ia u Myntri, iakynduh ia u Myntri Rangbah Duh” ula ong haba bynrap “Ngi la leh iala ka homework. Ngi la leh ia kane ka kam hynrei ka shimpor kumba nga onng namar kam dei ka rai kaba suk, namar ka Sorkar India shisien ba ka pynjynsur ia kawei ka Jylla, kiwei ki Jylla ruh kin sa dawa ia ki kyndon ba kyrpang na ka bynta jong ki ruh”.
Halor ka jingiatai halor ka Open Cast bad ka jingtih krem, u Conrad ula ong ba ka jingai jingmynjur ka shong ha ki agency ka Sorkar Pdeng.
“Ngam dei u engineer tih par kumta ngam lah ban kynthoh eiei halor kane ka bynta hynrei haba khmih ia ka kam, baroh kiei kiei ki don ia ka jingbha bad don ruh ia ka jingktah” ula ong.
