Shillong, Iaiong 16 : U Nongialam ka BJP bad MLA ka Pynthorumkhrah Bah A.L Hek ha ka sngi palei ula pyntip ba ula iakren bad ki Nongialam ka BJP ha Delhi ban pyntreikam ia ki skhim kum ka Swadesh Darshan bad PRASAD ha kaban pynroi ia ki jaka ba kongsan ha ka lehniam bad kolshor ha Meghalaya kynthup ka Seng Khasi Kmie, Behdienkhlam, Iingmane Nongsawlia bad krem Mawjymbuin.
“Nga la iakren bad katto katne ki nongialam jong ka BJP bad kila iathuh ia nga ba ki don katto katne ki sngi kiba lah ban pynroi ia ki jaka leh niam, kum ka Swadesh Darshan bad ka skhim PRASAD” ong u Bah Hek.
U iathuh ba ka BJP kala dep ithuh ia katto katne ki jaka ban pynroi hadien ka jingiakren bad ki nongialam na Jylla.
“Ngi kwah ban pynroi ia ka Seng Khasi Kmie, kawei na ki jaka lehniam kaba donkam bha ban pynroi bad ruh ka Behdienkhlam ha ri-lum Jaintia bad ruh na ka bynta ka jingmyntoi ka niam tynrai” ula ong.
U bah Hek u pyntip ba la ai jingmut ruh ban kyntiew iaka kam jngohkai na ka riti ka dustur.
“Kila ai jingmut ruh ban phah jingtyrwa na ka bynta ki Cultural Centre bad ka Cultural Tourism hapoh ka Khyrim Syiemship na ka bynta ka Shad Nongkrem” ula ong.
Haba phai sha ki Iingmane, u iathuh “Nga la tyrwa ruh ia kane ha ki Nongialam ha Delhi haba iadei bad ka Iingmane ba nyngkong eh ki Khristan ha Meghalaya bad lehse ha ka thain Shatei Lam Mihngi, kaba dei ka Iingmane Presbyterian ha Nongsawlia, Sohra”.
Haba iadei bad ka krem Mawjymbuin ha Mawsynram, u Bah Hek u pynpaw ba ka Sorkar Shnong kan hap shim ia ka rai.
“Nga la iathuh ia u Assistant Rangbah Shnong ka thain Mawsynram ba kam dei ka skhim BJP, ka dei ka Sorkar ka Sorkar hynrei ka dei pat jong ki skhim shnong” ula ong.
