Shillong, Risaw 28 : U Symbud Myntri Rangbah bah State President ka NPP Bah Prestone Tynsong ha ka sngi Balang ulaong ba ka jingwan iasoh ki MLA ka UDP kan nang pynkhlain ia ka party bad shisien ka sngi, kan sa pyniaid hi marwei ia ka Sorkar.
Ki lai ngut ki MLA ka UDP- Bah Paul Lyngdoh (West Shillong), Bah Renikton Lyngdoh Tongkhar (Mawkyrwat) bad Bah Nujorki Sungoh (Mookaiaw) — kila rung hynne ka sngi sha ka NPP.
“Ngi la thaw record mynta ka sngi da ka jingsoi kyrteng ki MLA ha ka form ka party. Kane kan iaid ha ka histori jong ka longiing ka NPP” ong u Bah Prestone.
U ong ba ka party kala sngap jar jar wat hapdeng ki khubor ba mih man ka sngi ba ka don ka jingiashrut hapoh ka party.
“La 2-3 bnai, ngi iohi man ka sngi ki jingkynthoh bala pynmih da ki paralok ha ki lad pathai khubor- ka jingialeh u Bah Paul, jingialeh u Bah Renik, jingialeh u Bah Nujorki. Ka dei kaba shisha ne ba bakla, ka shong ha ki. Na ka liang jong ngi hi ngi shu sngap jar, ngim shym la kynthoh eiei” ula ong.
“Hynrei mynta ka sngi ngi la iadonlang ha kane ka longiing. Ka jingwan iasoh jong ki kan nang pynkhlain shuh shuh ia ka party ha ka Jylla baroh kawei. Ngi tip bha ia ka jinglong kine ki laingut, ka jinglah treikam jong ki bad ka jabieng, hapoh ka Iingdorbar ne shabar ruh kumjuh” ula ong.
