Shillong, Risaw 28 : Ka Sorkar kala ujor da ka ejahar pyrshah ia u Inspector ka Khasi Hills Autonomous District Council (KHADC) namar ka jingkurup ia ka nongkynti ka Sorkar bala mang n aka bynta ban shna ia ka Shillong Ropeway project, ong ka Commissioner & Secretary ka Tnad Tourism Kong RM Kurbah haka sngi Balang.
“Ngi la ujor ia ka ejahar ha Laban Police Station pyrshah ia u briew uba leit khang ia ka project, u dei u Inspector” ong ka kong Kurbah haba bynrap ba ym pat don satia ka jingkem briew haduh mynta naba ki Pulit ki dang pyndep ia ki kam ba dei ban leh.
Haba pynshai ia ki khubor ba ka terminal point ha Lawsohtun lah leit ban khang da ka KHADC, ka kong Kurbah kala ong ba kane ka jingleh ka dei kaba beain namar ka jaka ka dei jong ka Sorkar Jylla.
“Ngi kwah ban pynshai ia kaei kaba jia hynnin ka sngi. Ngi la pyntip ba kane ka jaka jong ngi, ba pynieng ia ka terminal point jong ka Ropeway project, la leit khang da u Inspector ka KHADC. Ngi kwah ban pynshai ba kane ka jaka ka dei jong ka Sorkar. Ka dei ka nongkynti jong ka Sorkar” kala ong.
Ka kong Kurbah ka ong ba ki jingtei ha kane ka jaka ka dei tang ka len ba shipor bala buh da ka Tnad kat kum ki kyndon jingshngain kiba dei ban shim.
“Ha man ki project ngi hap ban buh ia ki len ban pynthikna ba ngi bud ia ki kyndon jingshngain hashuwa ba ngin sdang ia ka project. Ka project ka hap hapoh ka New Development Bank kaba kren shai halor ki plan ba iadei bad ka mariang lem bad ka imlang sahlang ki ban pynthikna ia ka jingshngain. Namar kane, ngi la buh ia ka len hangtei, kaba la pyniaid da ka Tnad” kala ong.
“Kumta, kane ka kam bala leh da u Inspector ka KHADC ha ka jaka jong ka Sorkar ka long kaba beain. Ka dei ka jaka Sorkar, ka dei ka project ka Sorkar bala pyntrei da ka tnad. Ka jingwan kyntur sha ka jaka ka Sorkar ka dei ka bym lah ban pdiang. Ngim sngewtynnad ia kane bad ngi la shim ia ki sienjam ba dei ban leh khnang ban shimti biang noh ia kane ka jaka” kala bynrap.
Ka Secretary ka Tnad Tourism kala pynpaw ruh ba kam pat don satia kano kano ka jingtei haba iadei bad ka ropeway bad ki jingkynnoh ki dei ki bym iahap satia.
“Ka jingthmu jong kane ka len ka long ban leh ia ki test halor ka khyndew, shna ia ka surok bad pynmadan ia ka jaka. Kam pat don satia kano kano ka jingtei haduh mynta. Kam pat don satia ka jingtih ia ki thliew paia-ngi don hynriew tylli ki paia- ym oat don ka jingtih na ka bynta ka terminal. Kumta ka jingkynnoh ba ngi lah sdang ia ka jingtei kam shym la don satia” kala ong.
Ka kong Kurbah kala pyntip ba ia ka work order lah ai ha ka 25 tarik Risaw, 2025, ia ka NoC na ka Dorbar Pyllun la ioh ha ka 4 tarik Jymmang, 2026 bad la aplai ia ka Trading Licence na ka District Council ha ka 18 tarik Jymmang, 2026.
“Kila aplai ruh ia ka NoC na u Syiem ka Hima Mylliem ha ka 16 tarik Naitung, ioh pdiang ia ka shithi ha ka 28 tarik Naitung. Ha ka 27 tarik Nailar la ai show cause sha u contractor da ka district council bad u contractor ula ai jubab. Ha ka 28 tark Nailur, lah ioh pdiang ia ka NoC na ka Dorbar Myntri ki San Kur bad 11 kur ka Riat Laban Mylliem. Kmta ki kam kila nang iaid” kala ong.
“Haba ia ki aplikeshon lah dep ban pdiang bad lah ai jubab ruh, kam dei kaba ngi la leh iakaei kaei ka bym long shai. Kam dei ban long ba phi leit sha ka jaka bad khang ia ka Ophis jong ngi” ong ka kong Kurbah.
Halor ka jingslem ban ioh jingbit na ka KHADC, kala ong “Ngam lah ban jubab ia ka kam jong ki, kane ka shong ha ki. Kila aplai ha u bnai Jymmang”.
