Shillong, Iaiong 16: U Myntri Rangbah ka Jylla Conrad K Sangma ha ka sngi Palei, ula iakynduh bad pynsngew ha ki nongialam ka Khasi Authors Society halor ka rai ba la shim da ka Kynhun Myntri ban ithuh noh ia ka ktien Khasi bad Garo kum ka Official Language ka jylla nalor jong ka ktien Phareng ne English.
Haba batai shaphang kane ka rai kaba sah jingkynmaw bad ki dkhot jongka Khasi Authors Society, u Myntri Rangbah ula ong, ba watla ia ka Resolution la mynjur hapoh ka Meghalaya Legislative Assembly ban kynthup ia ka ktien Khasi bad Garo ha ka Eighth Schedule, kumta ka long kaba donkam ban phah ia ka kyrwoh kaba khlain sha ki paitbah ka jylla bad sha ka Sorkar Pdeng ia ka jingkongsan ban kyntiew ia ki ktien tynrai ha baroh ki kyrdan bad ia ka mat ban kynthup noh ia kitei ki ktien ha ka Eighth Schedule.
“La bun snem kala don ka jingdawa na ki paitbah ban kynthup ia ka ktien Khasi bad Garo kum ki Official Language jong ka jylla bad nga dap da ka jingkmen ban pyntip sha phi ba ka kynhun myntri mynta ka sngi kala shim ia ka rai” ula ong.
U Myntri Rangbah ula bynrap ba kane ka long kaba kongsan bad ka sienjam kaba khraw watla ki kam ki jam ban wanrah pura ia kine ki ktien ha ki kam sorkar, ki jingphah ia ki jingthoh bad ka jingpynlong ia ki eksamin, kin shim por hynrei ka la shim ia ka rai ba ka rukom treikam ban pdiang ia kitei ki ktien. Ula ong ruh ba ha ka Dorbar Synrai ki nongthaw ain kin ym pat ioh ban kren ne iatai ha kitei ki ktien.
“Kan long kaba iahap bha ban don iaka Dorbar Synrai ha ka iingdorbar ba thymmai ha kaba ka jingiatai kan long ha ka ktien Khasi bad Garo” ula ong.
Ula pan ia ka jingkyrshan na ka Khasi Authors Society ha kaban pynwandur ia ki Rules, da kaba ong, “Ngi donkam iaka jingkyrshan ka jong phi ban pynthikna ba kane ka rai kaba ngi lah shim, kan dei kaba lah ban pyntreikam pura bad kan wanrah ruh ia ka jingkylla kaba donkam”.
Ula ong, ba ka rai kaba la shim kan nang pynkhlain ia ka jingdawa ban kynthup ia kitei ki ktien ha ka Eight Schedule.
Haba pynkut u Myntri Rangbah ula ai khublei ia ka Khasi Authors Society halor ka jingnoh synniang bad ka jingtrei shitom khlem shongthait kaba la lam sha ka jingshim ia ka rai kaban iai sah kynmaw.
“Ka Khasi Authors Society bad ka Achik Literature Society kila lamkhmat bha na ka bynta ban shim ia katei ka rai bad nga ai khublei ia ki bad nga pan ruh ia ka jingkyrshan ka jongki ha ka jingiaid kaba nangne shakhmat” ula bynrap.
Ha katei ka jingialang la iadonlang ki Symbud Myntri Rangbah ka jylla kiba kynthup ia u Bah Prestone Tynsong bad u Bah Sniawbhalang Dhar.
