Shillong, Iaiong 16: Ka Nangkiew Irat SC kala sdang ia ka 5th Meghalaya State League da kaba jop da 9-0 ia ka Mulang SC Nongbah ha ka jingiakhun ha ka Group B kaba la long hynne ka sngi Palei ha MFA Ground.
Ka Nangkiew Irat kala ioh thep 3 kol ha ka kylla step lyngba u Sangti Janai Shianglong ha ka minit kaba 12, u Banshanlang Nongdhar ha ka minit kaba 21 bad u Brolington Warlarpih ha ka 26 minit.
Ka Mulang Nongbah kala ialehkai ruh sa tang 10 ngut ki nongialehkai haba u Dawanlangki Susngi ula hap ban mih noh na madan ialehkai da kaba ioh arsien ia ka Yellow Card.
Ka Nangkiew Irat kala bteng ban thep sa 6 kol ha ka kylla miet lyngba u Sangti Janai Shianglong ha ka 56 minit, u Dibinroy Nongspung ha ka 57 bad 88 minit, u Banshanlang Nongdhar ha ka 85 minit bad u Restom Khriam ha ka 90 minit.
Hynne ka sngi kila don ki jingiakhun ha ki 7 tylli ki Group napdeng ki 8 tylli ki Group kaba la pynlong ia ka MSL kaba bunkam bad kaba shongshit.
Ka Mawlai SC kaba dang bat ia ka nam lahduh kala jop da 3-1 ia ka Amlarem SC ha ka Group C, katba ka Maram FC kala jop da 3-2 pyrshah ia ka A’chik SCO Rongjeng ha ka Group G. Ia kine ki jingiakhun la pynlong ha Amlarem bad Williamnagar,kiba dei ki jaka ialehkai kiba thymmai ia ka MSL.
Ka Rangdajied United FC kala jop da 2-1 ia ka Mawten SC ha ka jingiakhun ia ka Group H ha Mawkyrwat.
Ha ka Group A ha Shillong, ka Umkaber SCC kala pynrem ia ka Mawshun SCC da 3-2 ha SSA Stadium.
Ka Shillong Lajong FC kala pynrem da 3-0 ia ka Lumphyrnai Sohphoh FC ha ka Group E bad ha Khliehriat, ha ka Group D ka Thangskai Tiger SC kala pynrem da 1-0 ia ka Ladthadlaboh SC.
Ki jingiakhun lashai ka sngi kiban sdang ha ka por 3 baje mynsngi
Group B (Shillong MFA Ground) – Mawlum Tyrsad SCC vs Mawphu SC
Group C (Amlarem) – Laskein SCSC vs Lamin XI SCC
Group D (Khliehriat) – Jalaphet Pyrdung SC vs Rymbai Shkenshynriah SC
Group E (Wahiajer) – Iatyllilang Lumsehkot CSC vs Lamyrsiang SCC
Group F (Mairang) – Langsning FC vs Mishon SSCC
Group G (Williamnagar) – Janepih YSCA vs Attong Matgrik FC
Group H (Mawkyrwat) – Mawlarshong SC vs SS Umdang Pyllun
