Nongpoh, Iaiong 15: Ki Tnad ka Koit ka Khiah na Ri Bhoi District, ki la pynkup burom ia ki 12 tylli ki Shnong kiba hap hapoh ka Jirang C&RD Block namar ka jingbym don nongpang Tuberculosis (TB) kum shibynta jong ka program TB Mukt Bharat.
Ka District Tuberculosis Control Society (DTCS), Ri Bhoi District kala sam ia ki syrnot sha kine ki Shnong ha ka jingialang ba la pynlong ha ka ophis u Block Development Officers Jirang C&RD Block, ha ka jingia donlang u Myntri Sorkar bad MLA ka thain Bah Sosthenes Sohtun, ka Dr. E. Kalwing, District Tuberculosis Officer, u Dr. P Hajong, BDO, ka Dr. K Lyngdoh, Incharge ka Patharkhmah CHC nalor ki nongialam Shnong.
Haba kren ha kane ka sngi, u Bah Sosthenes Sohtun, u la ai ia ka jingiaroh ia ka Tnad kaba iakhun ban pynduhjait ia ka jingpang TB bad ruh ia ki nongialam Shnong bad ki nongshong shnong kiba ju iatreilang ban rat dyngkhong ia kane ka jingpang.
U la ong ruh, ba kam long satia kaba suk ban ialeh pyrshah ia kane ka jingpang hynrei ka jinglen lade jong ka ophis u DC, ka tnad ka Koit ka Khiah lem bad ka District Tuberculosis Control Society da ka jingiasnohkti lang ruh ki riew shimet, ki nongmihkhmat paidbah lem bad ki Dorbar Shnong ban pynbiang ia ki jingbam kiba tei bad ban kyrshan ia ki nongpang TB, shen yn lah ban poi sha ka thong.
U la kyrpad ruh ia baroh ki Dorbar Shnong lem bad ki nongshong shnong ban bud thik ia ki jingbthah jong ki bor ka tnad ka Koit ka Khiah ha kaban peitngor ia kane ka jingpang khnang ba kum ki Shnong kin nang ioh ia ka jingithuh na ki bor sorkar.
Ha kane ka sngi, la sam ruh ia ki jingbam ba tei met na bynta kito ki Shnong kiba dang don ia ki nongpang TB.
 kum shibynta jong ka program TB Mukt Bharat){kind=link}