Shillong, Iaiong 15 : U Myntri Rangbah ka Jylla Conrad K Sangma ha ka sngi Balang, ula plie paidbah ia ka Durbar Hall ba thymmai jong ka Nongstoin, West Khasi Hills, haba ban jur ia ka jingkongsan ka jingiatreilang hapdeng ka Sorkar bad ki Khlieh Nongsynshar ban pyntyllun shakhmat ia ka roi ka par ha ki shnong ki thaw.
Ha kane ka jingialang la iadonlang u MLA ka Nongstoin Bah Gabriel Wahlang, MLA ka Rambrai RG Momin, MDC bad Rangbah Shnong S Rashir bad u Secretary ka Dorbar Shnong Bah G Marbaniang bad kiwei kiwei.
Haba ai jingkren, u Myntri Rangbah ula ong ba ki Durbar Hall ki dei u doh jong ka jingiapyrshang lang hapdeng ka Dorbar Shnong bad ki Nongialam ka thain. “Kane ka hall ka dei ka nuksa ba kumno ka Shnong bad ki Nongmihkhmat paidbah ki ialam lang ban leh ia kaei kaei kaba don jingmut” ula ong.
U Conrad ula ban jur ba ka roi ka par kaba neh bad ba kynthup lang ia baroh ha Meghalaya ka shong eh ha ka jingiatrei lang ba iajan hapdeng ka Sorkar bad ki Dorbar Shnong. Ula pynthikna biang ia ka jingkut jingmut jong ka Sorkar Jylla ban kyrshan ia ki Dorbar Shnong ha ki sienjam ba ki shim na ka bynta ka bit ka biang ka shnong ka thaw.
Kane ka Durbar Hall ba thymmai la khmih lynti ba kan long ka jaka na ka bynta ban pynlong ia ki jingialang jong ka Shnong, ka jaka shim rai bad ka jaka pynlong ia ki prokram halor ka riti ka dustur nalor ban pynkhlain ia ka synshar khadar nala tynrai ha ka thain.
