Shillong, Iaiong 14 : U MDC ka BJP na Tura Bernard N Marak, ula ujor ia ka ejahar hahkhmat u Superintendent of Police ka West Garo Hills, ba dawa ban leh tyngeh kat kum ka ain halor ki jingkulmar, jingwiang ding bad pynjulor ia u mot Jisu ha iew Chibinang myn ha ka 9 tarik Lber.
Ha ka shithi ba 14 tarik Iaiong, u Marak uba dei ruh u Vice President ka BJP ha Jylla, ula iathuh ba la pyntip sha u halor kine ki jingjia ha ka jingleit jngoh jong u sha Chibinang bad ki shnong ba marjan kiba shah ktah ha ka jingkulmar ba dang shen.
“Ki paidbhur, kham bun ki dei ki mynder ba rung beain, kila ialum beain bad pynmih ia ki jingkulmar ha ka thain Chibinang myn ha ka 9 tarik Lber 2026, kaba la kynnoh pynshit bad aiding da u MLA barim bad MDC Estamur Mominin” ong ka jingujor.
Kat kum ka jingong jong u, ki paidbhur kila wiang ding ia katto katne ki dukan bad ki iing briew, kaba la pynjulor bun ia ki nongkynti bad ki lad kamai jakpoh. “Ki paidbhur kila pynjulor khnang ia u mot jong u Jisu Khrist ha Iew Chibinang, kaba la pynmong jur ia ka jingsngew jong ki paid Khristan” ula ong.
U Bernrad ula kynnoh ba ym pat don ejahar bala register haduh mynta bad kane ka kam ka paw kum ka jingleh bym iohi wat hapdeng ka jingktah jur ia ka jingshong suk shongsain hapdeng ki Jaidbynriew bapher bapher bad ka jinglong jingman ha ka thain”.
Ka jingujor ka pynpaw ruh ia bun ki jingkynnoh kiba hap hapoh ka Indian Penal Code ba kynthup ia ka kyndon 295, 295A, 153A, 436, 505, 120B , 141 haduh 149 .
Ula kyntu ia ki Pulit ba kin register mardor ia ka jingujor kum ka ejahar bad ban pynlong ia ka jingtohkit ka bym shah liang bad ba bniah bad ban pyndep ruh hapoh ka por kaba biang.
U MDC ula dawa ruh ban ithuh bad kem ia baroh ki briew kiba donkti kynthup kito kiba kynnoh kynshoit ia ki jingkulmar nalor ban ai jingiada ia ki nongshongshnong kiba shah ktah, ki nongsakhi bad ki riewngeit Khristan.
