Shillong, Iaiong 14: Ka Drug Reduction, Elimination & Action Mission (DREAM) ha ka sngi Ba-ar, ka la sam ia ki tiar hikai jingtbit sap (skill development tools) kiba shongdor palat T.9 lak sha ki saw tylli ki Rehabilitation Centre kum ka jingpyr shang ban iada bad pynduna ia ka jingkylla dih droks biang jong ki nongdih bala koit.
Haba kren ha ka jingialang, u Director ka DREAM Bah Francis Kharshiing ula pynpaw ia ka jinglong jingman ba ima halor ka jingkyrni dih droks ha Meghalaya, khamtam ha Shillong.
“Bun na kiba kyrni ki dei kiba dih heroin, bad u dei u droks ba ma tam kaba ngi la shem” ula ong.
U Bah Kharshiing ula pynpaw ba ki nongdih heroin ki pynlut hapdeng T.2000-T.2500 ha ka shisnngi ban pynneh ia ka jingmlien, bad don kiba donkam haduh T.10,000 shisngi namar ka jingkiew dor dang shen.
“Ki jingpyrshang iakhun droks jong ki Pulit kala pynduna ia ka jingpoi u droks ha Shillong,hynrei kala lam pat sha ka jingkiew ka dor, kaba pynbor ia ki nongdih ban leh ia ki kam bymman bad kylla long ki nongkhaii ban lah pynneh ia la ka jingmlien” bynrap u Bah Francis.
Ban leh eiei halor kane, ka DREAM kala iatreilang bad ka Rehabilitation Centre, ITI bad ki Vocational Training Institution ba kin ai ia ki jinghikai pyntbit ia ki sap treikam ia ki nongdih droks bala ioh jingkoit lane kito kiba dang don hapdeng ka jingsumar.
“Ka thong jong ngi ka long ban pynduna ia ka jingkylla dih droks biang kiba la koit, kaba kot mynta haduh 70-80%” ong u Bah Francis.
Kine ki tiar pynroi sap ba T.9 lak tam, yn pyndonkam ha kaban ai jinghikai kum ha ka kam shet jingbam, food processing, plumbing bad wiring ha ki saw tylli ki Rehabilitation Centre-ka New Hope (shynrang bad kynthei), New Life De-addiction Centre (shynrang) bad Asha Bhavan.
Ka DREAM kan air uh ia ka jingkyrshan ia ki nongdih droks bala koit ba kin sdang seng kam bad ban treikam lajong hadien ba ki ioh syrnot na ka ITI bad ki jingiarap ban pynioh jaka iohkam.
“Kan bha ban kynshew T.9 lak ha ka vocational training ha ka jaka ban ailad ba kin kylla dih droks biang bad nang ioh kham bun ki nongdih ne customer” pynkut u Bah Francis.
