Guwahati, Iaiong 7: U Myntri Rangbah ka Assam Himanta Biswa Sarma, u la ther tyngeh ïa u Rahul Gandhi, nongïalam ka Congress, da kaba ong ba ka jingkynnoh bamsap pyrshah ia u bad ia ka Sorkar Jylla, ki dei ki “bym don nongrim”.
Haba ïakren bad ki nongthoh khubor, u Sarma u la buh jingkylli ïa ka jingkren jong u Gandhi ba un shah set phatok lada ka Congress ka wan ha ka bor synshar. “Ha kine ki ar snem mynta, u Rahul Gandhi u ju wan sha Assam bad u ong ba un set ïa nga ha phatok, hynrei ha kano ka nongrim, lada phi kynnoh, phi dei ban pynshisha ïa ki, hato phi la ujor FIR ne PIL pyrshah ïa nga?” la ong u Sarma.
Shuh shuh u la kynnoh ba u Gandhi u “pynrit ialade” ha khmat ki paidbah da kaba kren ïa kum kine ki jingkren.“U Rahul Gandhi u dei u briew uba nabar ha Assam.Lada don kiba na Assam kiba kren eiei, ka pher.Hynrei haba u wan na shabar bad kren kum kine, kam shongkhia re”, la ong u Sarma bad bynrap ba utei u nongialam ka Congress hi u la mad ïa ki jingshah kynnoh.“Ki kti jong u kim long kiba khuid,” u la kynthoh.
U Sarma u la kam ruh ba ki jingkynthoh jong u Gandhi ki long kiba pyrshah ïa ka sain pyrthei.“Man la ka por ba u ong ba un buh ïa nga ha phatok, kane ka nang pynsngew synei ïa nga, khamtam hapdeng ki briew ki bym don bynta ha ka sain pyrthei.Nga pdiang sngewbha ba un wan biang—kane kan iarap tang ïa ngi ban ioh sa san haduh hynriew percent ka vote”, u la ong.
Haba pynpaw ïa ka rukom ïalap elekshon jong u, u myntri rangbah u la ong ba u la sngewthuh ba u la sdang kylla kaba la pynleit jingmut ha ki briew ha kine ki snem. “Mynshuwa, nga ju kren da kaba sngewskhem.Hynrei hadien ka COVID, nga la sdang ban pynïadei bad ki briew kham kyrpang—da kaba kyrpad ïa ki ban rwai, shad bad pynleit jingmut ha ka jinglong babha.Ka la thaw ïa ka jinglong jingman kaba sngewtynnad bad ka la ïarap ban tei ïa ka jingïadei mardor,” u la ong.
Haba pynpaw ïa ka jingsngewskhem halor ka jingmih na ka elekshon, u Sarma u la ong ba ka BJP kan ioh ïa ka “historic mandate”.“Nga ngeit ba ngin jop hapdeng 90 bad 102 tylli ki seat, watla nga kham sngewtynnad ban jop 90–95,” u la ong.
Halor ka jingsynshar, u Sarma u la pynskhem ba ka sorkar jong u ka la pynneh ia ka record kaba khuid.Ngi la pynthikna ia ka jingpynrung kam kaba shai bad pynpoi kam khlem kano kano ka jingartatien.Kane ka dei kawei na ki sorkar kaba khuid tam ha ka ri,” u la ong da kaba bynrap ba u Myntri Rangbahduh ka ri u Narendra Modi u la pynshlur ïa ki briew ban pule ïa ka rukom thungkam jong ka Assam.
U la ban jur ruh ba ka jingroi jingpar ha India ka dei ban iadei bad ka riti dustur jong ka.Haba ïadei bad u Mahatma Gandhi, u Sarma u la ong, “Ka rukom pynroi jong ngi kam lah ban bud matlah ïa ka Ri Sepngi.Ka dei ban shong tynrai ha ka kolshor bad ki jinglong jong ngi.Lada ngi duh noh ïa ka jinglong tynrai jong ngi, ngin duh noh ïa ka mynsiem jong ka ri India.”
