Result SSLC | Pass haduh 86.84 % | Thaw histori ka Gorkha Pathshala

Shillong, Iaiong 07 : Ka Meghalaya Board of School Educaton (MBoSE) ha ka sngi Ba-ar, kala pynbna ia ka result jong ka eksam Secondary School Leaving Certificate (SSLC), 2026, kaba ka jingpass jong ki khynnah ka kot 86.84%, kaba duna khyndiat ia ka result u snem bala lah kaba kot 87.10%.

Haduh 48,623 ngut ki khynnah ki ialeh ia ka eksam hynrei napdeng kine, 42,228 ngut kila pass, kynthup kito kiba pass ia baroh hynriew sobjek bad kumjuh ruh kiba pass ia san sobjek.

Ka result ka pyni ba ki khynnah ba ialeh regular ki kham pass bha ha kaba ki regular-1 kila kot 93.30%, katba ki regular-2 ki kot 80.72%. Kiba ialeh non-regular bad private ki kham duna ha ka jingpass.

U samla Waangal Lama jong ka Gorkha Pathshala Higher Secondary School, Shillong, ula ioh ia ka kyrdan ba hakhlieh duh da ka jinglah ban ioh haduh 585 marks. U Vishal Kumar jong ka Embee Rosebud Higher Secondary School, Tura, ula wan ha ka kyrdan ba-ar da ka jingioh 576 mark.

U Prajukta Roy jong ka Seven Set Higher Secondary School, Shillong bad Prinita Das jong ka Pechon A Sangma Memorial Police Public School, Tura, kila ioh ia ka kyrdan ba da kaba ioh mar 575 marks.

Ha ka kyrdan ba saw, lai ngut ki khynnah kila ioh- kata — Samdi Mukhim jong ka St. Anthony’s Higher Secondary School, Shillong, Nathanael Mantre Laloo jong ka Seven Set Higher Secondary School, Shillong, bad Wandarihun Lyngkhoi jong ka Anderson Higher Secondary School, Nongstoin — kiba la ioh mar 572 marks.

Ka samla Jenita Pator jong ka Sawlyngdoh Higher Secondary School, Mowkaiaw kala ioh ia ka kyrdan ba san da ka jingioh 571 marks.

Haba khein ia ka jingpass bha ki shynrang bad kynthei, ka jingpass ki shynrang ba ialeh regular ka kot 94.14% katba ki kynthei ka kot 92.88%.

Haba nujor ia ka result hapdeng ki district, ka West Jaintia Hills ka dei kaba don bun eh kiba pass kaba kot haduh 94.99%, bud sa ka South West Khasi Hills-94.60%, East Khasi Hills-94.17%, Eastern West Khasi Hills-93.31%, West Khasi Hills-92.95%, East Jaintia Hills-92.85%, South Garo Hills-88.48%, Ri-Bhoi-88.04%, West Garo Hills-77.75%, ka East Garo Hills-72.33%, South West Garo Hills-74.54%, bad North Garo Hills-72.70%.

Haba ianujor ia ki snem bala leit, ka pyni ia ka jingkham bha ka result naduh u snem 2025, ha kaba ka jingpass ki khynnah kala kiew sha ka 87.10% na ki snem bala leit.