Boko, Iaiong 06: U National President ka National People’s Party (NPP) uba dei ruh u Myntri Rangbah ka jylla Meghalaya Conrad K Sangma ha ka sngi Nyngkong ula hiar ialap elekshon ha Bamunigaon kaba hap hapoh ka 28–Boko Chaygaon (ST) constituency ka Jylla Assam ban pan jingkyrshan ia u kyrtong ka NPP u Ganseng B. Sangma.
Ha kane ka jingialap ilekshon la sakhi ka jingwan shim bynta daki hajar ngut ki nongkyrshan kiba la ïalum ban pynpaw ïa ka jingïatylli bad ka jingthmu jong ka NPP na ka bynta ka thaiñ shatei lammihngi.
Ha kane ka sngi la wan ban ïashim bynta da ki katto katne ngut ki nongïalam ka NPP, kynthup ïa ki MLA na Meghalaya bad ki MDC na Garo Hills Autonomous District Council (GHADC), ryngkat u National Vice President u I Hemochandra Singh bad u nongïalam ka Manipur Legislative Party u M Rameshwar Singh.
Haba kren ha ki paidbah, u Conrad u la batai ia ka ilekshon kum ka por kaba pynthikna ia ka jingiatylli ha ka thain. “Kane ka elekshon ka dei ka sur jong ka thain shatei lammihngi, ka sur ka ban sawa na Boko-Chaygaon”, u la ong da kaba pynksan ba ka resol ka ban mih kan pyni la ki paidbah ka thain ki la iatylli ne em hapoh kawei ka jingthmu.
Haba pynpaw ïa ka jingpynheh ïa ka party, u Conrad la pynpaw ba ka NPP ka la pynkhreh ban plie ïa ka account jong ka ha Assam bad ban pyndep ïa ka jingthmu jong u nongseng iaka NPP u PA Sangma ban tei ïa ka thaiñ shatei lammihngi kaba khlaiñ bad kaba ïatylli.
U la kynthoh ia kiwei National Party kiba leh politics ban pynpait pynpra jaka jaidbynriew bad u la khot ia ki nongthep vote ban kyrshan ia ka Party da kaba buh hakhmat eh ia ka jingiatylli bad ka jingroi kaba kynthup lang.
Haba pynkynmaw ia ka jinglong jong u kpa jong u, u Conrad u la iathuh kumno u PA Sangma un leit sha ki jaka kiba jngai ban kren wat ha ki jingialang kiba rit tam da ka jingsngewrit bad jingburom. U la kdew ba kum kane ka jingaiti ha ki nongrim ka long ka nongrim jong ka jingdon jong ka NPP kaba nangroi ha kylleng ka thaiñ.
“U symbai ba la thung da u PA Sangma ha Meghalaya shiphew snem mynshwa mynta u la heh bad long u dieng uba ai jaka rieh ïa ka thaiñ Shatei Lammihngi baroh kawei,” u la ong. “Ka jingangnud jong u ban pynïatylli ïa baroh ki jaitbynriew hapoh kawei ka rynsan ka la nang long kaba shisha.”
U Conrad u la kyntu ïa ki nongthep vote ban kyrshan ïa u Ganseng B Sangma, da kaba batai ïa u kum u nongïalam uba shisha bad uba aiti lut uba pynpaw ïa ka jingangnud jong ka NPP na ka bynta ka roi ka par kaba kynthup ïa baroh.
“Lada u Ganseng un long MLA, kan pyni ia ka jingthmu kaba thymmai ia ka NPP ha Assam”, u la bynrap.
Ha ka jingkren lyngkot jong u Ganseng B Sangma u la kular ban shakri da kaba aiti lut ïa ki paidbah da kaba ong, “Nga kren tang shi minit hynrei nga trei tang arphew”.
 uba dei ruh u Myntri Rangbah ka jylla Meghalaya Conrad K Sangma ha ka sngi Nyngkong ula hiar ialap elekshon ha Bamunigaon kaba hap hapoh ka 28–Boko Chaygaon (ST) constituency ka Jylla Assam ban pan jingkyrshan ia u kyrtong ka NPP u Ganseng B. Sangma.){kind=link}