Guwahati, Iaiong 2: U Rahul Gandhi, nongialam ka seng Congress, ha ka sngi Palei, u la kular ban pyntreikam ia ka Article 244(A) ha Karbi Anglong, lada ka seng jong u, ka wan ha ka bor synshar ha Assam, haba buh ia ka jingsynshar bad ka jingiada ia ka jinglong trai shnong, kum ka bynta ba kongsan jong ka jingthep vote.
Haba ai jingkren ha ka rally paidbah ha Karbi Anglong, u Gandhi u la ong ba kane ka jingpynbeit kan ai bor ïa ki nongshong shnong ba kin ïada ïa ka khyndew ka shyiap, ka kolshor bad ki marpoh khyndew jong ki.
Ka Article 244A jong ka Riti Synshar jong ka ri India ka ai bor ia ka Parliament ban thaw ia ki ain jong ki”autonomous state” hapoh ka jylla Assam, kaba kynthup ia ki jaka riewlum. Ka pynlah ban seng ia ka iing dorbar thaw ain lane ka Council of Ministers, kaba ai ia ka jingsynshar laitluid kaba kham khraw ia ki thain kum ka Karbi Anglong bad ka Dima Hasao.
“Lada ka sorkar jong ngi ka wan ha ka bor, ngin pyntreikam ia ka Article 244(A), ka ban ai bor ia ki briew lajong ban iada ia ka jinglong tynrai bad ia ka riti dustur jong ki.Ngi long kiba la kut jingmut ba pura”, u la ong.
Haba ther tyngeh ia ka BJP, u Gandhi u la kynnoh ia ka sorkar ba ka pynlong pdeng ne (centralising) ia ka bor bad ka ai jingmyntoi ia ki corporate ha ka jingduhnong ia ki nongshong shnong.
“Ngi ngeit ha ka jingpyniaid ia ka bor synshar sha kiwei pat ki jaka, hynrei ka BJP ka kwah ban synshar lut ia kiei kiei baroh na Delhi.Ia ka khyndew ka shyiap, ka um bad ki khlaw ki btap jong phi la knieh noh bad la aiti sha ki corporate ba heh”, u la kynnoh.
Shuh shuh u la kam ba ka sorkar ba la ialam da u Himanta Biswa Sarma ka la ai jaka heh ia ki industrial house, da kaba ong ia kane ka “jingbym hok” ia ki paidbah ka Assam.
U Gandhi, u la kynthoh tyngeh ïa u Myntri Rangbah ka Jylla, da kaba kynnoh ba u don ka jingbamsap bad u la maham ruh ban pynlong ïa ka jingtohkit lada ka Congress ka wan ha ka bor synshar.
“U dei u myntri rangbah ba bamsap tam ha India, lada ngi ioh ban thaw ia ka sorkar, ngin sa sdang ia ka jingtohkit pyrshah ia u”, la ong u Gandhi.
U la kdew ruh ïa u Myntri Rangbah ka Assam kum u “mini Narendra Modi,” da kaba kynnoh ba u leh lut katkum ka jingbthah jong ki central leadership.
Nalor ki jingshah ther ha ka sain pyrthei, u Gandhi u la pynbna ia ki jingkular kata ban ai ka jingkyrshan pisa kaba ₹50,000 na ka bynta ki kynthei ban sdang ia ki kam lajong, 10 lak ki patta jaka na ka bynta ki nongshong shnong, bad ka jingiada na ka bynta ka koit ka khiah kaba khlem jingsiew kaba ₹25 lak na ka bynta kawei ka long iing .
U la kular ruh ïa ka “jingbishar hok” ïa u nongrwai ba pawnam bha ka Assam u Zubeen Garg hapoh 100 sngi lada ka Congress kan thaw ïa ka sorkar.
Katba ka election kala jan, i kumba ka Congress ka buh ia ka jingsynshar hi, ka hok ha kaba iadei bad ka jaka bad ka bha ka miat kum ki phang pdeng ha ka jingialap elekshon jong ka.
 ha Karbi Anglong, lada ka seng jong u, ka wan ha ka bor synshar ha Assam, haba buh ia ka jingsynshar bad ka jingiada ia ka jinglong trai shnong, kum ka bynta ba kongsan jong ka jingthep vote.){kind=link}