Guwahati, Jylliew 5: Saw ngut ki dkhot na kajuh ka longïing ki la shah thang im ha ka jingpluh ding kaba shyrkhei ha Jaymati Nagar ha Jalukbari ha Guwahati ha ka step phyrngap jong ka sngi Thohdieng.
Kine kiba la khlad noh ki dei kiba la tip kyrteng kum u Kuddus Ali (65 snem), Kajoli (40 snem), u Safiqul (30 snem) bad u Sahid Ali (12 snem).Kane ka longïing ka dei na ka thaiñ Krishnai jong ka Goalpara District.
Katkum ka khubor ba la iohlum, katei ka jingjia ka la jia ha kawei ka jaka sah ba la ai wai kaba don ha ka Ward No. 6 jong ka Jaymati Nagar.La iathuh ba katei ka ding, ka la bam duh ia ar tylli ki iing.
“Ki lanot kiba la iap ki dang ioh thiah ha ka por ba ka ding kaba klang ka la pur stet lyngba katei ka iing, kaba la pynlong ia ki ban sahkut hapoh,” la ong uwei u nongshong shnong jong katei ka jaka.
Ki pulit bad ki nongpynlip ding ki la leit sha katei ka jaka tang hadien ba la pyntip ia katei ka jingjia.Ki kynhun na ki tnad Fire and Emergency Services, SDRF bad NDRF ruh ki la iadon bynta lang ha katei ka operation.
“Katei ka jaka sah, ka dei ba long trai da ka Rehena Choudhary, ka don kumba 10 tylli ki longïing kiba shong wai kiba sah ha ki 11 tylli ki kamra.Ha ka por ba jia katei ka jingjia, la ïathuh ba ki don 8 tylli ki longïing kiba sah ha katei ka jaka,” ong uwei na ki nongshong shnong katei ka thaiñ.
