Guwahati, Lber 29: Ka Assam Congress ha ka Sngi U Blei ka la pynlait paidbah ia ka manifesto jong ka elekshon Assembly ha Assam, kaba ai ia ki san tylli ki mat jingkular katba u President ka AICC Mallikarjun Kharge u la ialam ia ka jingialap elekshon ha Nowboicha.
Ka Congress ka la pynkhlain ia ka jingialap election jong ka ha Assam. Ki Nongialam jong ka seng ki dang ialap elekshon ha la ki jong ki jong ki jaka.
Haba kren ha ka jingïalang paidbah ha Nowboicha, u Kharge u la ong,”Ïa ka manifesto la shna ha ka jingïamir jingmut bad ki paidbah” bad ong ba ka dei ka lynti kaba thmu na ka bynta ka jingbha jingmiat, ka jingïada ha ka imlang sahlang bad ki hok jong ki trai ri trai muluk.
Ka Congress ka la kular ban ai jingiarap pisa khlem jingteh kyndon man la u bnai kaba T.50,000 sha ki kynthei na ka bynta ka jingseng kam seng jam, da kaba buh ia ka kum ka jingphet noh na kaei kaba u Kharge u khot “ki jingpynkylla ba don jingteh”.
Ka seng ka la pynbna ruh ïa ka jingai jingsumar khlem ka jingsiew pisa kaba long T.25 lak na ka bynta kawei pa kawei ka longïing, da kaba kdew ïa ki skhim kiba kum kine kiba la pyntreikam ha ki jylla ba la synshar da ka Congress kum ha Karnataka, Andhra Ptradesh bad Rajasthan.
U Kharge u la ong ba ka seng kan pynthikna ia ka jingbishar hok ha ka mukotduma u Zubeen Garg hapoh 100 sngi, da kaba kular ba ia kiba donkti yn pynngat ha ki kyndon aiñ.
Ka manifesto ka la kular shuh shuh ban ai jaka ba neh sha ki 10 lak tylli ki trai ri trai muluk, ban bujli ia ka rukom ai jaka kaba la don lypa man la u snem.
