Shillong, Lber 24 : Ka National People’s Party (NPP) kan pynieng iala u jong u kyrtong ha ka elekshon shiteng samoi ban wan jong ka Shillong Parliamentary constituency, pynthikna u Symbud Myntri Rangbah bad President ka NPP Meghalaya Bah Prestone Tynsong ha ka sngi Ba-ar.
“Na ka liang ka party, ngi la rai ban sei la u jong u kyrtong ha ka elekshon MP shiteng samoi bad kane ka ieng haduh mynta” ong u Bah Prestone haba iakren bad ki nongthoh khubor.
Hynrei ula kyntait pat ban iathuh ia ka por ha kaban pynbna ia ka kyrteng.
“Ka jingkylli jong phi ba lano bad mano ban long ki kyrtong-ia kane ngin sa pyntip sha phi kham hadien” ula ong.
Halor ka lynti ban iatreilang bad ka BJP, u Bah Prestone um shym la pynpaw eiei bad ong “Ia mynta ka rai kadei kaba la shim da ka party NPP. Kumta ka shong haki paralok jong ngi lane kano kano ka party ban rai la kin wan iasoh bad ngi ne em-ngin dang ban iakren ia kiei kiei baroh halor kane. To ngin peit ia kaei ka jingpynpaw jong ngi bad kaei kaba don ha ka jingmut jingpyrkhat jongki”.
“Hynrei na ka liang ka party, ngi la rai ban pynieng iala u kyrtong ha ka elekshon shiteng samoi ka Shillong Parliamentary constituency” ula ong.
Ia kane ka elekshon shiteng samoi la pynlong hadien ka jingkhlad noh jong u MP ka VPP Dr Ricky AJ Syngkon myn ha ka 19 tarik Rymphang.
