Shillong, Lber 24: San ngut ki kynthei na ka thain Shatei Lam Mihngi kila shah jied ban long kum ki Cabin Crew ha ka IndiGo Airlines hadien ba kila pyndep ia ka Campus Interview kaba la long ha ka sngi Baar ha Don Bosco Youth Centre, Laitumkhrah, Shillong.
Ia kane ka jingpynrung kam, la pynlong da ka Emporium Skills Training Institute (ESTI), ha kaba kila don 56 ngut ki samla kiba la wan ban iashimbynta na kylleng ki thain.
Ki nongpyniaid kila pyntip ba 3 ngut na ki samla kiba la shah jied ki kynthup ia ka Deilana Shallam, Cassandra War bad Silveris Mary Lyndem kidei ki samla Khasi kiba na ka jylla Meghalaya.
Kane kadei ka sien ka baar ba la pynlong ia ka jingpynrung kam ha ka Cabin Crew kaba la pynlong da ka Don Bosco Youth Centre hapoh jong ka jingiasoi ia ka soskular ne MoU ha u Nailur 2025 bad ka ESTI da ka jingthmu ban plie lad ban aikam aijam kaban don ruh ia ka jingai jinghikai ha ka liengsuin, ka rukom kren bad pdiang sngewbha bad ban ai jingshakri ha ki liengsuin.
Ha ka kyrwoh kaba la pynmih da ka Don Bosco Youth Centre kala pynpaw ba kane kadei ka sien kaba 4 ba la pynlong ia ka jinginterview ne jingkylli bniah hapoh ka jingiatreilang bad ki don ia ka jingthmu ban nang bteng ban pynlong shuh shuh ha ki bnai ban dang wan.
“Kane ka jingiatreilang ka pyni ia ka jingnang kiew ka jingshaniah kane ka karkhana ha ka rukom long rukom man jong ka jingai jinghikai ka jongngi” kala ong bad ka bynrap ba ka prokram jongka ESTI kan bteng ban pynkup bor ia ki samla ka Meghalaya da ka sap ka phong ban iohkam ha palat 20 tylli ki ri.
