Shillong, Lber 24 : U Lat ka Jylla ula ai ka jingmynjur ia ka Amendment jong ka Assam & Meghalaya Autonomous District (Constitution of District Council) Rules, ba ju tip kum ka AD Rules, kaba khang ia ki bar jylla ba kin iashimbynta kum ki kyrtong ne ban thep vote ha ka elekshon Garo Hills Autonomous District Council (GHADC).
Ia kane la pynthikna da u Myntri Rangbah ka Jylla Conrad K Sangma lyngba ka rynsan social media X.
“Nga kwah ban ai khublei ia u Lat ka Jylla halor ka jingai jingmynjur ia ka amendment jong ka rule kaba pynlong kongsan na ka bynta ki kyrtong ba kin don ia ka syrnot ST haba iakhun ia ka elekshon GHADC” ula ong.
Would like to thank the Hon’ble Governor for approving the amended rules making it mandatory for candidates to have ST certificate to contest in the GHADC elections.
— Conrad K Sangma (@SangmaConrad) March 24, 2026
Kane ka jingai jingmynjur u Lat ka dei ka jingkut ia ki bar Jylla ban ioh bsuh khlieh ha GHADC kum ki MDC bad kumjuh ruh ban long ki nongthep vote ha ki elekshon ka Council, kaba la urlong hadien 74 snem ka jingdawa jong ki paid Garo.
Ka Dorbar Kypang jong ka GHADC ba long hynnin ka sngi Balang, kala wanrah ia ka amendment ban pynkylla ia ka AD Rules bad ka Iingdorbar da kawei ka sur kala ai ia ka jingmynjur.
Kat kum kane ka amendment, la pynlong kongsan ba ki kyrtong kiba kwah iakhun ia ka elekshon GHADC ki dei ban don ia ka syrnot Scheduled Tribe (ST), kaba mut ba tang ki riewlum kin ioh iakhun ia ka elekshon ne ban thep vote-kaba dei ruh ka jingkut ia ki bar jylla.
U Myntri Rangbah ka Jylla Conrad K Sangma, ula ai ka jingiaroh ia kane ka sienjam kum ka kam kaban sah jingkynmaw ha ka histori jong ka GHADC.
“Ka iingdorbar ka GHADC kala mynjur ia ka resolution ka ban sah khana ha ka histori….kaba la pynlong kongsan ia kino kino ki kyrtong ki ban iakhun ia ka elekshon ka Council ba kin hap don ia ki syrnot Scheduled Tribe” ong u Conrad ha ka jingialang hakhmat ka Ophis ka NPP ha Tura.
“Kane ka dei ka rai kaba kongsan bha…ki District Council ki dei ha ka jingshisha kiba mang beit thik tang ia ki riewlum jong ka thain. Ka dei ka jingdawa kaba la sahteng la slem bha jong u paidbah hynrei ha kine ki 74 snem bala leit, ym don satia ki Sorkar lane ki District Council ki ban lah leh eiei halor kane”.
Kane ka amendment kala jia hadien ka jingkulmar bad ka jingkynad pher Jaidbynriew kaba mih na ka jingpyrshah ia ki bar jylla ba kin iakhun bad thep vote ha ka elekshon GHADC.
Namar kane, ka Sorkar kala hap ban pynkynriah ia ka elekshon kaba la buh ban long ha ka 10 tarik Iaiong bad hadien, kala rai ban pynjlan ia ka samoi treikam ka Council sa hynriew bnai, ban ailad ia ka Executive Committee ba thymmai ba kan wanrah ia ki jingpynkylla ia ka AD Rules kat kum ka jingkwah u paidbah.
