Shillong, Lber 23 : Ka Sorkar Jylla kala buhteng ban shim ia ka rai ba khatduh halor ka jingpynkynriah ia ki dukan madan na Laitumkhrah, haba aipor 10 sngi ia ka Tnad Urban ffairs bad ka Dorbar Shnong ba kin iajurip lang ia ka jaka hadien ba ka jingiakren ha ka sngi Nyngkong, kam shym la lah ban iapynbeit ia ki katto katne ki mat kiba kongsan.
U Symbud Myntri Rangbah ba khmih ia ka Tnad Urban Affairs Bah Sniawbhalang Dhar ula ong ba ka jingialang-bala iashimbynta da ka MLA ka East Shillong Kong Ampareen Lyngdoh bad u Rangbah Shnong ka Dorbar Shnong-kala kut da katto katne ki jingmih ki iahap bad katto katne ki bym iahap bad ym don satia ki jingmih kiba thikna.
“Kila pan por na nga sa shiphew sngi, kumta nga la ai ha ki ia ka por ba kin shim ia ka rai ba thikna” ong u Bah Sniawbha haba iakren bad ki nongthoh khubor.
“Ki don katto katne ki jaka kiba ngi hap ban peitbiang bad pynshisha biang. Hapoh 10 sngi kan sa don ka jingiajurip lang hapdeng ka Tnad Urban Affairs bad ka Dorbar Shnong ka Laitumkhrah bad kin sa aiti ia ka kaiphod. Ngin pyrshang ban pynkut ia kane ka kam kham kloi kat kaba lah” ong u Bah Sniawbha.
U Bah Sniawbha ula pyntip ba ki Ophisar kim pat don satia ia ka jingkhein ba khatduh halor ka jingdon ki nongshong dukan madan kiba hap ban pynkynmaw namar “ki dang don katto katne kiba dang shu wan thymmai. Ia ka jingkhein yn sa shim rai ha ka taiew ban wan” ula bynrap.
Tang mar syn dep pynbeit, ka jingpynkynriah kan donkam la kumno kumno ruh 30 sngi ban ai notice bad u khmih lynti ba ia kane ka kam yn lah ban pyndep hapoh ka arbnai…kat kum ka ain.
Ka Kong Ampareen kala pynthikna ba la iapdiang ia ki jingai jingmut bala pynsngew da u Rangbah Shnong. “Ki don katto katne ki jingwit namar ki surok ha ki thain Laitumkhrah ki dei kiba rit bad khapngiah bad ka iaid ka ieng ki kali bad ki briew ruh ka jur bha” kala ong. “Ngi donkam ban hap leh phikir bha haba ngi iakren ia ka jingpynkynriah ha ki surok bala don lypa kumta u DyCM u sngewbha shibun ban sngap ia ka Dorbar Shnong. Kyrmen skhem ba ki kam ki jam kin iaid kumba la tyrwa”.
