Hadien 74 snem, khang ka GHADC ia ki bar jylla na ki elekshon ADC | Dei ka jingpynkylla ba radbah, ong u CM

Shillong, Lber 23 : Ka Garo Hills Autonomous District Council (GHADC), ba ialam da ka National People’s Party (NPP) kala pynkylla ia ka AD Rules ba pynlong kongsan ba baroh ki kyrtong ki dei ban don ia ki syrnot Scheduled Tribe (ST) ban iakhun ia ka elekshon ka Council, kaba mut ka jingkhang pyrshah ia ki bar jylla ha ka sien ba nyngkong eh naduh ba pynkha ia ka Council ha u snem 1952.

U Myntri Rangbah ka Jylla Conrad K Sangma, ula ai ka jingiaroh ia kane ka sienjam kum ka kam kaban sah jingkynmaw ha ka histori jong ka GHADC, kaba shong ia ka Dorbar Kyrpang hynne ka sngi Nyngkong.

“Mynta ka sngi kad ei ka dorbar kyrpang ka District Council. Ka iingdorbar kala mynjur ia ka resolution ka ban sah khana ha ka histori….kaba la pynlong kongsan ia kino kino ki kyrtong ki ban iakhun ia ka elekshon ka Council ba kin hap don ia ki syrnot Scheduled Tribe” ong u Conrad ha ka jingialang hakhmat ka Ophis ka NPP ha Tura.

Da ki hajar ngut ki paidbah kila ialum hakhmat ka Ophis ka NPP ban iashad kmen bad iarisa ia ka jingurlong ka jingangnud jong ki ban khang ia ki bar jylla ba kin iakhun bad thep vote ha ka elekshon ka GHADC.

“Kane ka dei ka rai kaba kongsan bha…ki District Council ki dei ha ka jingshisha kiba mang beit thik tang ia ki riewlum jong ka thain. Ka dei ka jingdawa kaba la sahteng la slem bha jong u paidbah hynrei ha kine ki 74 snem bala leit, ym don satia ki Sorkar lane ki District Council ki ban lah leh eiei halor kane”.

Ka Amendment ka pynrung ia ka kyndon ba donkam ka syrnot ST ha ka elekshon GHADC, kaba khang syndon ia ka lynti kaba ailad ia ki bar jylla ba kin ieng iakhun kum ki kyrtong ban long dkhot ka Iingdorbar kaba lah pynkha hapoh ka Sixth Scheduled ban iada ia ka synshar khadar hi ki riewlum.

Kyrpad u Conrad ban pdiang ia ka da kaba jai jai.

“Nga thikna ba baroh ki paralok bar jylla kin sngewthuh ba kane ka Council ka dei kaba la pynkha khnang na ka bynta ki riewlum…..Nga thikna ba kan don ka jingiatreilang na baroh ki liang bad ngi baroh ngin iatreilang hapdeng ka jingsuk bad ka shongsuk shongsain ban pynthikna ba ngin pyntyllun shakhmat ia ka ri-lum Garo bad ka Jylla baroh kawei”.

Kaneka rai kala wan mih ruh hadien ba ka Sorkar kala rai ban pynjlan ia ka samoi treikam jong ka GHADC da hynriew bnai hadien ki taiew jong ki jingkulmar bad jingiakhih pyrshah ia ka jingiashimbynta ki bar jylla ha ka elekshon ka Council, kaba la buh hashuwa ban pynlong ha ka 10 tarik Iaiong.