Tura, Lber 15: Ka jinglong jingman ha West Garo Hills district kala long jaijai ha ka Sngi U Blei bad ym shim la don kino kino ki jingjia ha kano kano ka bynta jongka district, watla ki bor pyniaid district kila rai ban pynjlan ia ka korphiw kum ka lad ban tehlakam ia ka jingiakynad.
Ki bor district kila pynjlan ia ka korphiw naduh ka por 6 baje mynstep jong ka 16 tarik u Lber haduh ka 6 baje mynstep jongka 17 tarik u Lber.
Hynrei kan don ruh ka jingpynjynsur ia ka korphiw kaba 12 kynta naduh ka por 6 baje mynstep haduh 6 baje janmiet ha ka 16 tarik u Lber ban ailad ia ki nongshong shnong ba kin trei ia la ki kam kiba man la ka sngi.
Ha kine ki kynta jingpynjynsur ia ka korphiw, ki jaka pule, ophis, ki bank bad kiwei kiwei kin ioh ban trei kumba ju long.
Hadien ba ka jinglong jingman kala sdang ban wanphai biang sha ka jingjaijai, ka Peace Crusade kaba la ialam da ki nongialam balang kila iai bteng ban iaid shakhmat sha ka sngi kaba 4, da kaba pynlong ia ki jingiaseng duwai ha Chandmari Playground ha Tura.
Ki bor district kila pynpaw ia ka jingsngewnguh ia ki nongialam shnong kiba la iai bteng ban ai ka jingiatreilang ha kaban tehlakam ia ki jingiaumsnam bad ban pynneh ia ka shongsuk shongsain ha ka district.
La pynjur ia ka jingpahara ha ki jaka kiba kongsan katba ki bor kiba dei khmih bad ki pukit ki iai bteng ban khmih bniah bha ia ka jinglong jingman.
