Shillong, Lber 04: Ka nongialehkai Football na ka jylla Meghalaya ka Sanfida Nongrum ha ka sien nyngkong eh ba kala ioh mihkhmat ia kynhun ialehkai Football ka ri India kala ioh ban thep ia ka kol pyrshah ia ka Vietnam ha ka Group Stage jongka AFC Women’s Asian Cup 2026 kaba la long ha Perth Rectangular Stadium.
Ha kane ka jingiakhun ka ri India kala mad ia ka jingshah rem da 1-2 kol ha ka Vietnam.
Ka Vietnam kala ioh thep ia ka kol kaba nyngkong ha ka minit kaba 30 lyngba ka
Van Su hadien ba ka Bich Thuy kala ai ia ka bol kaba biang bha, ia kaba ka nongapkol ka Panthoi kam shim la lah ban leh eiei.
Ka India kala ioh ban thep ia ka kol ha ka minit kaba 52 lyngba ka Sanfida Nongrum kaba la pyniakhaid ia kane ka jingiakhun, hynrei hashwa ban kut noh ka por ha ka minit kaba 95 ka Van Su kala ioh ban thep ia ka kol kaba la pynthikna syndon ia ka Vietnam ban khur ia ka jingjop.
Ka Vietnam kala ioh khur 3 point bad kala bat ia ka kyrdan kaba nyngkong ryngkat bad ka Japan hynrei kaba la khlain pat ha ka jingiapher haka jingioh thep kol, ka India kan hap ban pynkhreh bha ialade na ka bynta ki jingiakhun kiba nsa wan.
