Plie ia ka Museum ba pynsah nam ia ki matti u Purno
Tura, Lber 4: Hynne ka sngi Balang, la rakhe kynmaw burom ia ka lyngkhuh sngi iap kaba Shiphew jong u P. A. Sangma da kaba pynlong ia ka jingialang ha P.A. Sangma Stadium, Tura, ka jingbuh syntiew bad ka jingkynmaw ieid ia ki kam kiba la noh synniang da une u nongialam ba radbah ka Jylla.
Ia kane ka jingkynmaw burom la pynlong da ka P. A. Sangma Foundation, ia kaba la wan ban iashimbynta da u Lamphang ka iingdorbar thawain ka Jylla u Thomas A. Sangma, ka MP barim ka Agatha K. Sangma kaba long ruh ka khun kynthei jongu PA Sangma ryngkat bad ki bahaiing bahasem bad ki paitbah.
Ha kane ka lyngkhuh sngi iap kaba shiphew, la plie paidbah ruh ia ka P.A. Sangma Museum kaba pyni shaphang ka jingim bad ia ki kam kiba seisoh kiba la leh da une u Speaker barim ka Lok Sabha bad u nongialam ba radhbah ka jylla Meghalaya. Ha kane ka Museum la buh ia ki jingsah jingkynmaw, ki dur bad ki jingthoh ha ka jingiaid lynti jong une u nongialam na ka jingsdang kaba rit shduh ban kynjoh kum u nongialam ha ka ri.
La buh ruh ia ki dur ki dar naduh ka por ba u PA Sangma u dang leit skul, kaba la ailad ia ki nongwankai ban iohi ia ka jingiaid lynti jong une u nongialam uba la khlad noh bad nalor kane la buh ruh ia u mot sahnam jong u P.A. Sangma bad kumjuh ia ka shuki kaba u sngewtynnad tam ban shong khnang ba ki paidbah kin ioh ban peit.
Kane ka jingrakhe kynmaw burom ka long kum ka jingai khublei ia ka jingnoh synniang jong une u nongialam ia ka jylla bad ia ka ri, ha kaba ki nongkren kila pynkynmaw ia ka jinglong nongialam, ka jingiohi jngai bad ia ki jingkular ha ka kam shakri paitbah.
